إدمان النكد

0




ممكن اساينمنت عمال تاجل فيه لحد قبل الديدلاين بساعتين يحسسك بالذنب (ده لو بعد الشر لسه ضميرك صاحي يعني :v )
ممكن يبقي يوم حلو وصاحي متفائل, وتلاقي ايميل يتبعت بديدلاين كمان يومين يشغللك "كتاب حياتي يا عين" من الاول لللآخر في لحظه. لو هندور عالنكد فالمصادر كتير يعني مش هنعد يا جماعه :v اي نعم في ناس مصفحه ومبيتنكدوش من كل ده (عقبالنا احنا كمان D: ) بس كل الحاجات دي اسباب منطقيه الي حد ما للنكد والشعور بالذنب.
السؤال بقي...ليه احيانا بنتنكد بردو ونحس بالذنب, بس فجأه ,من غير مقدمات ومن غير ما تحصل اي حاجه تحسسنا ب ده؟ النكد الغير مبرر ده مصدره ايه؟
إيه اللي بيحصل؟؟ والاهم من ايه اللي بيحصل, ازاى تفض العركه اللي بتقوم فجأه دي ؟؟
الموضوع ده فيه نظريات كتير, بس فكرة انك تبقي فجأه في حالة "نكد غير مبرر" بشكل متكرر, دي اتكلم عنها د/أليكس كورب من جامعة كاليفورنيا قال في كتابه The Upward Spiral: Using Neuroscience to reverse the course of depression . إنهم لقوا ان الشعور بالذنب والقلق بيفعلوا نفس المناطق في المخ اللي بتنشط لما تحس بالفخر والإنجاز, او بمعني آخر لما تتكافئ.
لأ استني, عشان الموضوع كبير D:
مراكز المكافأه أول ال reward centers اللي بتشتغل دي هي نفسها النشاط الدماغي اللي بيخليك تحب او تدمن اي حاجه, من اول انك تحب القعده مع صحابك جدا, تحب تحقق انجازات وتنجح, لحد الادمان من اول السوشيال ميديا لحد ادمان الكوكايين. دي العلامه اللي بتقول للمخ "كتر من عمل الحاجه دي". عقاقير الادمان غرضها الاساسي انها تفعل الReward centers دي من غير ما انت تكون عملت حاجه تستحق المكافأه!

بس ده إيه علاقته بإن دماغك بتنكد عليك ؟؟
علاقته ان المخ بيحب شعور المكافأه اللي بييجي من الreward centers دي جدا! فمخك بدل ما يخليك تعمل حاجه بتحبها تحسسك بالفخر و تشغل مراكز المكافأه في المخ, ممكن يخليك تقلق وتحس بالذنب عشان يشغلها! وده بيفسر ليه فجاه ممكن تلاقي القلق ظهر من العدم, او الشعور بالذنب سيطر عليك بدون داعي مباشر لده. ده بيفسر ليه ممكن تلاقي عقلك فجأه قرر انه يقلبها عليك نكد :D انت يتنكد عليك وهو يتكيف :V
**للأمانه العلميه السطرين الجايين دول كلامي انا, مبني علي ملاحظات مش كلام الكتاب**
المشكله ان (تبعا لمبدا الoperant conditioning في علم النفس) مخك ممكن يشكل ويعيد تشكيل تصرفاتك بناء علي انهي تصرفات بتفعل الreward centers دي أكتر. يعني لو بتحسس نفسك بالذنب كتير وعودت نفسك علي المشاعر دي, عقلك ممكن يخليك تتجه للتصرفات والاشخاص اللي بيحسسوك بالذنب والنكد عشان يشغل الreward centers دي تاني. زي لما تلاقي نفسك بتأجل اللي وراك لحد اخر لحظه في حين ان عندك وقت, انت "حرفيا" بتدمن المشاعر اللي بتوجعك!

طيب إفرض حصل, تطلع من الدايره دي ازاى؟
د/أليكس كورب في كتابه قاللك ان الحل سهل جدا. وقف قطر الأفكار ده للحظه وجاوب علي سؤال
"أنا ممتن/شاكر/مبسوط بإيه دلوقتي؟" لقوا إن زي ما إدمان النكد بيحصل بسبب إن بيولوجيا المشاعر دي بتفعل مراكز المكافأه في المخ, فمن الناحيه التانيه الشعور بالإمتنان اللي بتحسه لما تفكر في او تدور علي الحاجات اللي ات مبسوط/ممتن ليها بيأثر برده في مخك علي المستوي البيولوجي.....ومش بس بيأثر ده تأثيره احيانا بيبقي مشابه لتأثير مضادات الإكتئاب المعروفه زي prozac و wellburtin.
Wellbutrin ده من مضادات الاكتئاب بيعلي مستويات الناقل العصبي المصاحب لشعور المكافأه "الدوبامين"...... لقوا ان مشاعر الامتنان اللي بتطلع لما تعدد الحاجات اللي انت ممتن ليها بتزود مستويات نفس الناقل العصبي في جسمك برده. ولو اتوصفلك (او لحد تعرف) ادوية اكتئاب, فغالبا عديت علي Prozac قبل كده او سمعت عنه. بروزاك مضاد اكتئاب برده, وظيفته علي المستوي البيولوجي هو انه بيعلي مستويات هرمون السيروتونين "الهرمون المصاحب للشعور بالسعاده" وده بيوصفوه لمرضي الاكتئاب عشان يحسن حالتهم المزاجيه. Guess what؟!   الشعوربالامتنان بيزود نفس الهرمون ده برضه.
بس هل منطقي إن مشاعر و افكار بتغير كيمياء مخك؟
اه منطقي, زي ما الخوف اللي هو مشاعر مع افكار برده بيفعل في جسمك الfight or flight response  وبيعلي مستويات الادرينالين والكورتيزول في الدم. الموضوع مريب شويه انا عارفه :v
حتي لو ملقتش حاجه ممتن ليها, انت في السليم! لو مفيش اي حاجه خالص انت ممتن ليها في حياتك كلها بكل نواحيها فدي حاجه حزينه جدا, بس تبع كلام د/كورب ده مش هيفرق في الحاله دي. لحد هنا الراجل بيتكلم كلام زي الفل. بس النصيحه اللي قالها وانا استغربتها علي المستوي الشخصي حتي, ان مش لازمتلاقي اجابه لسؤال "انا مبسوط/ممتن/شاكر لإيه دلوقتي؟! "  عشان جسمك يفرز سيروتونين ودوبامين. مجرد بس تدويرك علي الحاجات اللي بتحبها ومبسوط لوجودها في حياتك يقدر يحسن حالتك المزاجيه ويخلي جسمك يفرز دوبامين وسيروتونين من غير ما تاخد عقارات مضاده للاكتئاب.
ملحوظه: مبقولش ان لو بتاخد مضادات اكتئاب بطلهم وركز علي الامتنان, لا طبعا, متاخدهمش ولا توقفهم الا باستشارة دكتورمختص, اللعب بادوية الاكتئاب خطر واضراره كبيره جدا. انك تسال نفسك السؤال بتاع"انا ممتن لايه" مش مضر في كل الحالات بس متوقفش علاج علي اساسه الا بتوجيه مختصين

لو في لحظه حسيت ان مخك هيبدأ يفتح حقيبة الذكريات البائسه من غير داعي مباشر لده, وقف فرح الاحزان اللي هيبدأ في دماغك واسأل نفسك "انا مبسوط/شاكر/ممتن لإيه دلوقتي؟" جربها وقولنا..... لو اشتغلت معاك يعني, هانبسط اوي D:
لو عايز تقرأ أكتر عن الموضوع او تتأكد من المصادر, فالمحتوي متاخد من مقال علي مدونة إريك باركر Neuroscience reveals 4 rituals that will make you happy اللي مقتبس من كتاب The Upward Spiral: Using Neuroscience to reverse the course of depression, one small change at a time سي يو سوون D:


الأطفال, الجينات والإنتحار

0





كل 40 ثانيه في واحد في مكان ما في العالم بينتحروا! في حالات كتير بيبقي عنده تاريخ طبي ونفسي واضح زي الدخول فيي اكتئاب مزمن لفتره طويله. بس في اوقات كتير جدا, الانتحار ده بيصدم كل اللي حواليه. المنتحر بيقرر ينهي حياته بإيده, بغض النظر عن كل حاجه في حياته. ابحاث كتير اتعملت عن العلاقه بين طريقة التربيه والاحداث اللي بتحصل للشخص في مرحلة الطفوله, وقابليته انه يحاول الإنتحار. بس اللي جاي ده اغرب من ما تخيلت! 

في دراسه اتعملت لقوا ان الفئران اللي امهاتهم كانت بترعاهم رعايه فيها تقارب نفسي وdirect contact (زي لعق راسهم, وانها لما ترضعهم تغطيهم بجسمها) كانت تعاملهم مع الخطر والخوف مختلف عن الفئران الل امهم كانت بتقدملهم احتياجاتهم الاساسيه وبس (زي انها بترضعهم من غير ما تلعق جسمهم, وفي وقت الرضاعه بتستلقي علي جنبها وبس من غير ما تغطيهم بجسمها). ومش بس كده, في اختلافات غريبه  تانيه ظهرت!  


  عشان الباحثين يعرفوا تأثير التقارب النفسي في مرحلة الطفوله علي تصرفات الفئران,  جابوا مجموعه منهم ومنعوا الأكل عنهم, بعدها بفتره من التجويع المتعمد, حطولهم أكل في بيئه جديده ميعرفوهاش. البيئه الجديده بالنسبه للفئران بتمثل خطر محتمل, مكان ميعرفوهوش قبل كده وعقلهم ميعرفش ممكن يلاقي فيه ايه, في نفس الوقت اللي جوعهم فيهم بيزقهم انهم يروحوا ياكلوا الاكل اللي هناك في اسرع وقت ممكن. رد فعل الفيران اللي امهاتهم كانت بترعاهم بشكل مقرب وهما صغيرين اختلف بشكل واضح عن الفيران اللي امهاتهم كانت بترضعهم وبس.


 بالرغم من ان المجموعتين تم تجويعهم لنفس المده, إلا إن فيران المجموعه الأولي (اللي امهم اعتنت بيهم) لما شافوا الأكل بصوا علي المكان اللي فيه الاكل, لقوا ان مفيش خطر يعرفوه (زي ان مفيش قطه شرسه مثلا) فجريوا عالأكل وأكلوا لحد ما أكتفوا ورجعوا.  في حين ان فيران المجموعه التانيه (اللي امهم فيها رضعتهم وبس من غير اي تقارب نفسي), واللي كانوا جعانين جدا برده, بصوا علي المكان الجديد ملقوش مصدر خطر يعرفوه, ففضلوا خايفين وواقفين في  مكانهم لفتره, في فيران من المجموعه دي ماراحوش للأكل الا بعد فتره طويله جدا, ولما راحوا ياكلوا قعدوا فتره اقل في الاكل  ورجعوا جري!



في دراسه تانيه لقوا ان الموضوع مش بس اختلاف في التصرفات, بعد اسبوع من الولاده,  بدأ يظهر تغيير إيبيجينيEpigenetic modification علي الفيران اللي اتحرمت من رعاية الام, يعني اجسام الفيران الصغيره بدأت تشغل جين معين علي حساب جين تاني, بسبب اللي بيحصل في البيئه المحيطه (طريقة تعامل الام مع الفيران دي). المشكله بقي ان الgene اللي اتفعل ده عمل تغييرات بتقلل من قدرة المخ علي التعامل بشكل سليم مع القلق و التوتر.  خلص الاكشن ؟؟؟ لا يافندم لسه في تاني *بصوت الراجل بتاع اعلانات الشركه السعوديه*  :v

فوق ده كله ظهرت فروق بيولوجيه "واضحه" في تركيب المخ عند كل مجموعه منهم!!  الneural system او النظام العصبي اللي بينظم رد فعل الكائن عند الخوف "اتغير" في مجموعة الفيران اللي امهم اهملتهم  في مرحلة الطفوله, التغيير ده خلي الخوف والتوتر يؤثر عليهم وعلي تصرفاتهم بشكل أكثر حده.





طب الليله دي كلها عند شوية فيران, ايه علاقته بالانتحار :D   لا ما هو Guess What ؟ ده مطلعش عند الفيران بس! الباحثين لقوا نفس التغييرات الإبيجينيهEpigenetic modifications دي عند مجموعه من المنتحرين "البشر"!! أيوه! التغيرات اللي حصلت في جينات الفيران اللي كانت واقفه مرعوبه في التجربه, كانت شبيهه جدا بالتغيرات اللي حصلت في جينات المنتحرين. نفس التغييرات اللي خلت مخ الفيران مش بيتعامل مع شعور الخطر بشكل فعال, وخلاهم بدل ما ياكلوا, يقفوا مرعوبين!! التغيرات دي مش مقتصره بس عالفيران, دي كمان في البشر!

لو هنعكس ده عالبشر, هنلاقي إن اب وام بياكلوا ويشربوا ولادهم لا يعني ان "كده كفايه اووي هنعمل ايه تاني؟", المجهود المطلوب عشان الاهالي يضمنوا لاطفالهم حياه كريمه مش قليل ومينفعش حد يقلل منه! بس لوحده مش كفايه, الرعايه النفسيه للاطفال والتعبير عن الحب والاهتمام مش حاجات optional, ومش رفاهيات. الحاجات دي هي اللي هتخلي مخهم يعرف يتعامل مع مشاعر الخوف والقلق والخطر بشكل سليم من وهم اطفال لحد ما يكبروا. ومش كفايه برده ان الاب/الام يقولوا لاطفالهم "خليك شجاع" ولا "خليكي قويه" وخلاص علي كده, الكلام ده حلو, بس تاني! لوحده مش كفايه.


طيب لو ده حصللك في طفولتك, ايه الحل؟؟ للأسف معرفش! لو شايف ان ده حصللك وانت صغير ومأثر عليك متترددش في إنك  تروح لمختص وتطلب المساعده. زيارة معالج نفسي مفيهوش اي حاجه غلط ياجماعه أقسم بالله :D  لو اخدت الخطوه وقررت انك تروح لمعالج نفسي ومش عارف تروح لمين. هتلاقي كل اللينكات اللي ممكن تساعدك في اخر المقال.


الحاله النفسيه لينا كبشر هي قاعدة البناء لاي حاجه في حياتنا, فبلاش ننفضلها ونتعامل معاها كرفاهيات, او انها "دلع وانشف كده شويه امال" او "طلع الموضوع من دماغك وانساه" عشان للاسف احنا كبشر اعقد من كده شويتين, ولو مشاكلنا هتتحل باننا "نطلع المشاكل وننساها"  وبس مكنش حد غلب :D

 الابحاث والمصادر كلها اهي , لو عايز تتاكد من معلومه او لا قدر الله عجبك الموضوع وعايز تعرف عنه أكتر :V 



تجربة اختلاف تصرفات الفئران
https://www.ncbi.nlm.nih.gov/pmc/articles/PMC20261/

الدراسه اللي عرفوا منها التغير الإبيجيني 
https://www.ncbi.nlm.nih.gov/pubmed/15220929/

الدراسه اللي بتثبت ان نفس التغير الإبيجيني حصل عند المنتحرين برده
https://www.ncbi.nlm.nih.gov/pmc/articles/PMC3495635/

العلاقه بين كاريرك و أولمبياد الصرف الصحي

0


سنة 2004 في الوقت اللي المصارع كرم جابر أخد فيه المدياليه الذهبيه لمصر في المصارعه الرومانيه في الأولمبياد في أثينا. 

فريق Jamaica Hackle-heads أخد الميداليه الذهبيه في أولمبياد الصرف الصحيSludge Olympics

 في أمريكا, عدد مهول من عمال المجاري بيشاركوا بمنتهي الشغف في أولمبياد الصرف الصحي كل سنه, مش كفايه انهم بيشتغلوا فيه كل يوم, لا هما كمان بيقعدوا يتمرنوا للاولمبياد والمنافسه بتبقي شرسه جدا   :") 


طبعا انت دلوقتي بتسأل نفسك ده ايه علاقته بكارييرك بما انك مش ناوي تشتغل في الصرف الصحي غالبا, بس استني للاخر هتعرف :V 
الفكره الاساسيه مش في الاولمبياد, الفكره في شغفهم بمسابقه في مجال مرهق لكل الحواس البشريه بالشكل ده! 

للتوضيح بس, لو انت واحد من عمال الصرف الصحي, هيبقي جزء كبير من شغلك انك بتنزل بنفسك في مواسير الصرف الصحي, وتمشي فيها لحد ما تلاقي العطل فين في الماسوره وتصلحه في وقت قياسي, مش محتاجه أحكيلك عن الريحه ولا أشلاء الحيوانات اللي ممكن تعدي جنبك وانت ماشي يعني :’D 





لما سألوا واحد فيهم عن سبب السعاده اللي هو فيها دي  قاللهم انه كفايه عنده انه بيخدم الناس
“It’s enough to serve the public” 


هما مبسوطين كده ليه؟ 


إزاى الناس دي مبسوطين بالشكل ده؟ معلش عايزه افهم بس ايه اللي يدعو للحماس في تصليح المجاري ؟؟ :D   في حين ان ناس تانيه شغلهم في مكاتب مكيفه بمرتبات أعلي بكتير جدا,وشغلهم من أكبر مصادر التعاسه في حياتهم؟؟
 هو مش جزء من الانبساط بالشغل انك تقعد في مكتب حلو كده وتكييف والحركات اللي بنشوفها في الأفلام دي؟ الإجابه طلعت لأ! 

 في ناس بتعرف تحط مجهود كبير اووي في حاجه واحده, قد تكون صعبه او غير مريحه, وتتحمل فشل ناس كتير جدا ميعرفوش يتحملوه, ولو سألتهم هتلاقي انهم مستمتعين فعلا باللي بيعملوه ودايما بيتحركوا من بروجكت للتاني لحد ما بيبقوا عباره عن كتله من الخبرات والvalue ماشيه عالأرض. النمط ده بيظهربوضوح في الناس اللي قدرت تعمل إنجازات كبيره اوي في العالم, ستيف جوبز اللي اتطرد من شركته فبني شركتين كمان, ايلون ماسك اللي شركته سبيس اكس اتقال عنها إنها Failed itself into existence, يعني انها من كتر ما فشلت نجحت. توماس ايديسون اللي جرب الاف المحاولات لحد ما وصل للمبه. مقومات النجاح العاديه زي الاجتهاد والمثابره والحاجات دي كلها مهمه, بس الناس اللي شغلهم في الليفل اللي بنتكلم عنه ده عندهم حاجه زياده!
إنهم بيشوفوا في شغلهم  معني, أو Purpose, الناس دي حاسين بأهمية وقيمة شغلهم ده في العالم.


في الصوره دي شوية مطبات بسيطه من اللي  قابلها الحاج إيلون ماسك في الكام سنه اللي عاشهم :") 



 دلوقتي الnetworth بتاعه عدي ال14 بليون بحبه حلوين, يلا ملناش دعوه, ربنا يكرمه :v










صفي النيه !  It's all about perspective 

د/ Amy Wrzesniewskiمن جامعة Yale  عملت دراسه عشان تعرف ايه اللي بيفرق الناس اللي سمعت عنهم فوق دول, وباقي الناس؟ 

تبدأ بمين؟ بدأت بالمستشفيات, لأ ! مش الدكاتره, ولا الممرضات برضه, د/آمي بدأت بعمال النظافه, اللي جزء كبير من الناس بيعتبرها اقل شغلانه تقدر تلاقي فيها معني في مكان زي المستشفي.  خلال الدراسه قعدت مع عدد كبير جدا منهم وسالتهم كذا سؤال عشان تعرف اكتر عن نظرتهم لوظيفتهم ومدي سعادتهم فيها.  الإجابات اللي قالها عمال النضافه قسمتهم لمجموعتين, مجموعه شايفه ان وظيفتهم وظيفه مش مطلوب فيها أي مهارات, انهم مش بيستمتعوا بيها وإنهم مكملين فيها بس عشان المرتب والتأمين الصحي والحاجات دي كلها. ولما اتطلب منهم يوصفوا اللي بيعملوه في شغلهم كان تقريبا مطابق للوصف الرسمي لوظيفة عمال النظافه.


 نيجي بقي للمجموعه التانيه! مبدائيا كده, كانوا شايفين ان الوظيفه اللي هما فيها دي محتاجه مهاره كبيره, واتكلموا عن ازاى بيتعاملوا مع المرضي اللي بييجوا المستشفي وعلاقتهم بيهم, لدرجة ان في ناس منهم خرجوا تماما عن المتطلبات الرسميه للوظيفه, واحد من عمال النظافه بدأ يتعلم اكتر عن المركبات الكيميائيه المستخدمه في المنظفات اللي بيستعملها ويشوف ايه منهم مضر لحالات المرضي في الاوض اللي بينضفها, عشان يختار المنظفات الآمنه بالنسبه للحالات دي بالذات. واحده تانيه لقت ان في مجموعه من المرضي مبيحيلهمش زوار فبقت تخصص فترات تروح تقعد فيها معاهم عشان ميحسوش بالوحده. والكبيره بقي!
ان لما اتسئلوا إيه وظايفهم, الاجابه مكنش ليها علاقه بمسئوليات الوظيفه الرسميه, واحده كانت اجابتها ان شغلها انها تعمل كل حاجه في وسعها عشان تساعد المرضي يتشافوا بشكل أسرع, واحد تاني قال انه شايف انه بيمثل المستشفي قدام المرضي ولازم ده يبقي في احسن شكل ممكن.

 د/آمي لاحظت  إنهم أكثر سعاده وابتهاج من المجموعه الأولي. وعلي حسب كلامها, هما مش بس حولوا شغلهم لمصدر سعاده, الناس دي عمليا كأنهم بيشتغلوا في وظيفه مختلفه عن المجموعه الأولي. بالرغم من إنهم مش بس بياخدوا نفس الفلوس زيهم زي المجموعه الاولي, دول كمان بيبذلوا مجهود أكتر بكتير في شغلهم.


بتبص لشغلك إزاى؟ 

في مقال Making your job more meaningful في The Harvard Business Review   د/بيل بارنيت قال إن البحث بتاع د/آمي قَسِم رؤية الناس لشغلهم ل 3 انواع

1- النوع الأولاني بيشتغل بس عشان الفلوس, وكل علاقته بشغله بتنحصر في ساعات العمل الرسميه وبس, قاللك ان النوعيه دي في الغالب بيبقوا كارهين شغلهم. مش لاقيين معني في اللي بيعملوه, ودايما بيدوروا علي حاجه تانيه يعملوها.


2- النوع التاني بيشتغل عشان الانجاز وتحقيق الذات, عشان يترقي ويشتغل في شركه كبيره ويركب عربيه فخمه والبرستيج والحاجات دي كلها. الشخص ده لو شاف انه بينجح في شغله وبيحقق انجازات هيبقي مبسوط, بس لو شايف انه مش بيتقدم في الكاريير بتاعه بالسرعه اللي هو عايزها, او حس انه مش في المكان اللي يستحقه هيبدأ يحس بضيق وخنقه من شغله. بالرغم من ان النوعيه دي ليها اوقات بتبقي مبسوطه فيها, الا ان كتير بيفكروا هل هما بيتعاملوا فعلا كما يستحقوا ولا لا؟ وهل في حاجه أحسن؟؟


3- نيجي بقي للنوع التالت! دول اللي بيغيروا الطريقه اللي بنشوف بيها  العالم,  الناس دي بقي مختلفين تماما عن أول اتنين, النوعيه دي من الناس بتشوف ان شغلهم مصدر سعاده, ان المكافاه مش في مرتب ولا برستيج قد ما هو في الشغل اللي بيعملوه نفسه. بيبقوا مبسوطين باللي بيعملوه وحاسين بأهميته علي المستوي الإنساني, فبيدوا شغلهم مجهود ووقت وتركيز اكتر من الباقي لانهم فعلا مستمتعين بيه.  هنا بتلاقي واحد زي د/بين كارسون من أمهر الجراحن في العالم, و اول جراح يعمل عملية قلب مفتوح. هنا هتلاقي ستيف جوبز اللي قال ان هدفه مش انه يعمل فلوس كتير لكن to create a dent in the universe, وهنا ممكن يكون إنت! حتي لو انت مش هنا دلوقتي, فلو طريقة الشغل دي عاجباك, فإنت تقدر تبقي منهم!

 التويستايه بقي في الناس دي ان مش بس بيبقوا مبسوطين وسعداء باللي بيعملوه لا دول كمان بسبب اهتمامهم بشغلهم واهتمامهم بالتعلم المستمر في مجالهم وصقل حرفتهم, بيبقوا أنجح وبيكسبوا أكتر!

لما تحب الشغل ويبقي مصدر سعاده وتقدير للذات, هتديله وقت أكتر, هتهتم إنك تطلع فيه نتايج احسن, فطبيعي جدا ان لو دي عندك مع متطلبات النجاح الاساسيه التانيه (زي الاجتهاد والصبر و ..و..), هتبقي عالمي!




الكلام ده جميل وكل حاجه, بس لو انت مش اولريدي في المجموعه الذهبيه دي؟؟ ولو الصوره اللي فوق دي بتمثل الكاريير بتاعك إلي حد ما :D , تعملها ازاى؟؟  من الحاجات اللي ممكن تعملها, هي إنك تشوف بيعملوا ايه وتجرب تطبقه علي نفسك.

 
توضيح صغير بس كده :D 

د/آمي نفسها اشتغلت فتره علي تطبيق ابحاثها علي الناس من خلال حاجه اسمها job-crafting, بس المشكله انها قالت ان في مجموعه من الناس بيكرهوا شغلهم جدا, وبالرغم من انهم طبقوا الكلام ده وحسن الوضع بالنسبالهم الا انهم لسه برده بيكرهوه, يعني لو مثلا بتدرس هندسه في حين انك مبتكرهش في حياتك قد الماث زي حالاتي كده, يبقي الخطوه الجايه مش انك بس تغير طريقة تفكيرك ناحية شغلك, ده مطلوب انك تغير شغلك شخصيا, وللاسف ده مش موضوعنا هنا :D 


حبيتهم ؟ 💖

 لو حبيت المجموعه التالته وعينك بدأت تطلع قلوب, أو وصلت لمرحلة "ايوه, ربنا يباركلهم, أنيل ايه انا يعني؟" وبدأت تشتم.
ف د/بيل بارنيت في نفس المقال قال ايه المبادئ اللي الناس دي بتفكر بيها, وده اللي فرقهم فعليا عن غيرهم. فصلي عالنبي كده وإقراهم يمكن تبقى منهم وتدعيلنا D":

المجموعه التاالته دي بيميزها 3 حاجات في تعاملهم مع شغلهم

1- بيحطوا أولويه لخدمة غيرهم, بيفكروا ازاى اقدر اساعد الناس باحسن شكل ممكن من خلال اللي بعمله, بيربطوا الشغل اللي بيعملوه بتحسين حياة غيرهم وإسعادهم.

مارك زوكربيرج لما سألوه ليه بيلبس نفس التيشرت الرمادي كل يوم, قال
"I'm in this really lucky position, where I get to wake up every day and help serve more than a billion people. And I feel like I'm not doing my job if I spend any of my energy on things that are silly or frivolous about my life," 

مارك قال انه شايف انه محظوظ جدا انه بيقدر يخدم اكتر من مليار انسان كل يوم,ولو أهدر طاقته علي حاجات سخيفه وملهاش قيمه حقيقيه "زي اختيار هدوم مختلفه كل يوم" يبقي كده مش شايف شغله كويس. 





 لما جربت النقطه دي في حياتي انا شخصيا, مبقيتش اخاف يتقاللي "لأ" زي الأول, مبقيتش اخاف من الفشل اووي, لان الشغل نفسه لما اتربط بافادة ناس تانيه والتأثير فيهم بقي أهم بكتير من إني اكنسل project لمجرد اني خايفه افشل. 


2- بيهتموا بحرفتهم وجودة الشغل وبيدوله أولويه. 
الفرق بين الحرفه والتعلم, هو ان الحرفه مش مقتصره  علي قرايه او تعلم  بس, لا ده انك تتعلم وتعرف وتقرا وتطبق اللي عرفته ده في شغلك وتغلط فيه مره واتنين وعشره لحد ما تظبطها والكوالتي بتاعة شغلك تعلي. 

انك تحضر كورس بابلك سبيكنج ده تعلم, بس إنك تقف كل يوم قدام المرايه وتدي لنفسك
talk
 10 دقايق وتجرب فيها اللي اتعلمته ده 



واحده واحده لحد ما تتقنه,دي اسمها حرفه. 


والكلام ده اه بالرغم انه احيانا بيحتاج مجهود الا انك مع الوقت بتبدأ انك بتدور بنفسك علي إيه عندك محتاج تحسنه, و ممكن يتحسن ازاي, مش بتبقي بتجري من اخطائك والنواقص اللي في شغلك, انت عمليا بتبقي بتجري وراها عشان تحسنها وتطلع شغل أحسن وأحسن. 




3- الفلوس مش رقم واحد بالنسبالهم, لما بياخدوا قرارات في الكاريير بتاعهم اكيد مش بيرموا عنصر الفلوس في الزباله بس مش هو ده اللي بيحدد الطريق اللي هيمشوا فيه, يعني لو عندك وظيفه في شركه كبيره بمرتب عالي, ولا تشتغل في شركه صغيره هتتعلم فيها اكتر وشغلك هيبقي مؤثر فيها اكتر من الشركه الكبيره, فلو انت من العينه التالته اللي بنتكلم عنها هتختار الاوبشن التاني.


لو شايف الكلام ده غلط, أكتب رأيك في الكومنتات, ولو شايفه صح إكتب في الكومنتات برده عادي :D 


ولو عايز تقرأ أكتر عن الموضوع, فدي المصادر
https://hbr.org/2012/04/make-your-job-more-meaningful

هي ليه بتعمل كده؟

0



البنت اللي كل علاقه بتدخلها بتدور فيها علي واحد يأكدلها انها جميله, محبوبه, قويه, مهمه......اللي دايما بتدور علي واحد يحسسها بنفسها.

البنت اللي من بداية مرحلة المراهقه اللي الطبيعي ان اي بنت فيها بتبدا تنجذب للاولاد اللي في سنها, بقت بتنجذب لمدرسينها, كبرت شوبه ودخلت كليه فبقت تنجذب للدكاتره اللي بيدرسولها....واللي في اغلب الاحيان في النهايه بينتهي بيها الامر انها بتتجوز واحد اكبر منها بعشره او عشرين سنه.

وأخيرا البنت اللي قررت تركن مشاعرها علي جنب, ده مش معناه انها مبتحسش, لا هي بتحس عادي جدا.... بس هي قررت (بشكل واعي او لاواعي) انها متدخلش في اي علاقه فيها مشاعر حقيقيه مع أي شاب/راجل في حياتها, دي هتلاقيها في الاغلب مركزه جدا (فوق المطلوب) في الcareer بتاعها, معظم وقتها بتخدم اللي حواليها, بتنزل في مراكز تطوعيه,......إلخ. من الاخر بتشغل نفسها بكل الاشكال الممكنه عن الحته الضلمه اللي جواها. أو ممكن تتجه لناحية انها بتدخل في علاقات مع راجل متجوز, في حين إنها عارفه إن مستحيل تبقي committed فعلا كزوجه تانيه. يعني من الاخر داخله في علاقه هي نفسها عارفه انها مش هتكمل.

نيجي للسؤال المهم............هما ليه بيعملوا كده؟؟
 الأولانيه معندهاش نقص لأ, والتانيه مش مريضه نفسيا والتالته مش كارهه صنف الرجاله وقررت تترهبن  في الواقع ممكن تكون شايف حياتهم من بره عاديه جدا, مجموعة من الباحثين (اللي هنتكلم عنهم هنا) قالوا ان ممكن الخلل يبقي في شعورهم بأنوثتهم. ال3 حالات دول ممكن يحصلوا بسبب غياب الأب من حياة البنت خلال مراحل نموها, الغياب ده (اللي مش شرط يبقى غياب فعلي, ممكن يبقى الاب فيه موجود في البيت بس حاضر غائب) ممكن يسبب إن البنت تبقي من جواها مش حاسه بقيمتها كأنثي, في الحالات اللي فوق دي كلها ممكن تكون البنت واثقه في نفسها جدا كبني ادمه وناجحه ومتفوقه وكل حاجه بس الثقه اللي بتبقي واقعه في الحاله دي هي ثقتها بنفسها "كأنثي" مش كشخص.

د/جابريلا كورتش كتبت في البحث اللي نشرته بعنوان Fatherless Women: What Happens to the Adult Woman who was Raised Without her Father ان البنت في مراحل حياتها بتشوف قيمتها كأنثي منعكسه في تعامل باباها معاها, فلو التعامل ده مكنش موجود بسبب وفاه, سفر أو حتي لو كان والدها موجود معاها فعليا لكن مش بيديها الوقت والاهتمام كافي. أيوه حتي لو الأب متواجد في نفس البيت او حتي في نفس الاوضه مع البنت طول اليوم, لكن مش مديها الاهتمام الكافي ده نفسيا ممكن يعمل أثر مشابه لكونه موجود معاها اصلا ده لو مكنش التأثير أسوأ. النقطه دي صدمتني شويه بس خلينا نكمل للآخر.

طيب ليه؟؟ يعني ليه مجرد تجاهل اب لبنته ممكن يؤدي لمشكله بضخامة ان بنت او ست تعيش طول حياتها مش حاسه بأنوثتها؟
في مقال لاخصائيين علم النفس د/تيم جوردون وزوجته, قالوا ان الرعايه النفسيه (وهنا نحط 100 خط تحت نقطة الرعاية النفسيه, مش بس المادية)  اللي بيقدمها الأب لبنته بيديها شعور بأنوثتها وبكيانها من ناحيه, ومن الناحيه التانيه بيبني القواعد النفسية اللي هتحسسها انها شخص مرغوب من الجنس الآخر. ومن خلال كلامه معاها بيوصللها ازاى تتعامل مع الجنس الاخر وبيفكروا ازاى وتتوقع ايه منهم, تعامله معاها بيعرفها ايه مقبول منهم وايه مش مقبول. لما ده كله بيغيب ويغيب معاه شعور الابنه بحب باباها, بتبدأ نفسية البنت يا إما تدور علي حب الأب في مكان تاني او تقرر انها هتقفل مشاعرها كلها ومش هتفتح قلبها للجنس الاخر اصلا.

طيب, والحل إيه؟؟ 
انا مش متخصصة فمقدرش أفيدك في ايجاد حل, لو حاسه انك مريتي بالتجربة دي ومأثره على حياتك الأفضل تناقشيها مع معالج نفسي, بس في كام نقطه من رأيي الشخصي البحت (مش كلام علمي) ممكن يساعدوكي:

1- انتي مش لوحدك, اكتر من تلت الاسر في العالم الاب مش موجود فيها, ده غير البيوت اللي الابهات موجودين فيها لكن غايبين سواء بسبب سفر او بسبب عدم معرفتهم باهمية الاهتمام باطفالهم, فبيبقي الاب في الحاله دي الحاضر الغائب. ده مش معناه ان "عادي ما كتير من البيوت كده" لكن معناه ان دي مشكلة شائعه, كونها شائعه لا يعني اننا عادي نتجاهلها او منشوفلهاش حل, بس معناها انك مش لوحدك.

2- كل واحد ربنا خلقه بتحديات معينه في حياته المطلوب انه يحله, اللي اتخلق من غير ايد ورجل, اللي عمل حادثه ففقدهم....اللي اهله ماتوا...اللي يائس ومحبط.....وحاجات تانيه كتير, ممكن يكون في حالتك انتي ده من التحديات بتاعك, لو الكلام ده هيسببلك شوية حزن احزني ده حقك بس بعد ما تحزني متقعديش و شوفيلها حل (ممكن لو المشكلة معطلة حاجه في حياتك او مسببه مشاكل تلجأ لمعالج او معالجة نفسيه).

3- اطلبي المساعده, ممكن يكون المجتمع اللي حواليكي شايف ان دي تفاهات او أفوره أو "عادي يعني, ما كل الناس كده" ده ميمنعش أبدا ان وقع عليكي أذي بشكل او باخر بسبب اللي حصل ده, ممكن تقري عن الموضوع اكتر لو حابه, في كتاب اسمه The Fatherless Daughters Project كان بيتناقش في نفس الموضوع ده, ممكن يفيدك, او لو الموضوع كبير ومسبب مشاكل فهقولك تاني روحي لمعالج نفسي لان دي مشكله محتاجه حل.

الموضوع طويل شويه بس للأسف معظم البيوت المصريه بيحصل فيها تجاهل من الاب لاطفاله وكتير بيبقي مش بايدهم بسبب الضغوط اللي بتكون عليهم وظروف الشغل و...و..و.. او كونهم مش واعيين لاهمية دوره في حياة بناته وتأثيره عليهم, للأسف في النهايه البنات هما اللي بيدفعوا التمن في حياتهم وعلاقاتهم فكان لازم ننقل الكلام ده.

في بنات وستات كتير جدا حياتهم بتتأثر سلبا بسبب غياب اهتمام الأب ورعايته النفسية ليهم. لو مريتي بده وشايفه ان للغياب ده كان ليه تأثير سلبي على حياتك او مشاعرك او قراراتك فعايزه اقولك متتردديش انك تطلبي مساعدة متخصص (معالج او معالجة نفسيه) لأن مش لازم تأثير اللي حصل في طفولتك يكمل معاكي باقي حياتك. محدش بيرجع ويغير الماضي بس نقدر نداوي الجروح اللي حصلتلنا منه.

كل سنه وإنتوا مبسوطين :)

1




بكره رمضان <3

اغلب البوستات اللي بقراها خلال الفتره دي بتتكلم عن جمال الصيام والصلاه في رمضان, ودي حاجات جميله جدا اكيد مش هنختلف عليها يعني :D  بس زي ما بتصلي وتصوم في رمضان ركز علي انك تبقي مبسوط...مش معني انك صايم انك تبقي متكدر ومتعصب وكل ما حد يكلمك تقوله "اللهم إني صايم"..... بلاش تحوله من شهر سكينه وراحه لشهر عصبيه عشان صايم يعني :D :v 


عشان كده في البلوج قررنا نخليه السنه دي شهر السعاده, اقعد نخرب طول الشهر ورا الانبساط....اعمل كوباية الشاي المتينه واكتب النهارده كل الحاجات الصغيره اوي اللي ممكن تعملها لحد تخليه سعيد في رمضان, واكتب الحاجات الصغيره اووي برده اللي ممكن تعملها و انت صايم وتخليك مبسوط.....وعشان نساعدك تبقي مبسوط, هننزل بوستاتنا طول شهر  رمضان عن اجابة سؤال "انت ازاى دايما مبسوط كده" اللي بيتسئل لاغلب المباسيط اللي نعرفهم. D


  ومش لازم وانت بتكتب يبقي السعاده في رمضان في الحاجات اللي كل الناس بتقولها (التراويح, الفطار مع العيله, القرآن.....) الحاجات دي حلوه جدا فعلا وممكن تبقي من اكبر مصادر السعاده في حياتك كلها مش بس في رمضان...... بس كمان ممكن تكون اللي هيبسطك اوووي  في رمضان إنك تقرا كتاب يعلمك حاجه جديده (مش شرط يبقي قرآن وبس)....او في انك تسافر يومين عالبحر...أو  تنزل تلف في البلد وتستكشف الحاجات اللي مشوفتهاش فيها قبل كده....ممكن في انك تبدأ رحله جوا نفسك تحاول تجاوب فيها عالاسئله الكتير اللي راكنها  بقالك سنين من غير إجابه......صلي التراويح وافطر مع عيلتك بس متنساش تبقي انت نفسك من جواك مبسوط
 
وبرده مش لازم عشان تبقي مصدر للسعاده بين اللي حواليك تخلص مرتب الشهر كله علي عزومه :D 
ممكن تبقي مصدر سعاده بانك تريح مامتك وتقوم تعمل الفطار مكانها النهارده.
ممكن تبقي في انك تزور جدتك وتحسسها انها مش لوحدها.
ممكن انك تشوف صحابك اللي ماشوفتهمش من زمن.
ممكن بانك تظبط خروجه مع قرايبك اللي مشوفتهمش من سنين وتبقي صلة رحم
ممكن تبقي في خير تعمله لحد متعرفهوش (او تعرفه عادي برده :D ) .


اللي عايزين نقوله في البلوج السنه دي انك تخلي رمضان شهر تسعد فيه نفسك و تنشر فيه السعاده في المكان والمجتمع اللي انت فيه.


#كل_سنه_وانتي_مبسوطه<3
#كل_سنه_وانت_مبسوط <3  

#البلوج
#في_رحلة_البحث_عن_الانبساط 
​

العلم وراء "حبيبي تسلم"

0


بتغلس علي صاحبك في كومنت؟ 
بتشكر أخوك عشان نزل بنفسه يرمي الزباله بدل ما يصحيك ترميها انت؟  
صاحبك سابك مستنيه ساعه ونص في الشارع, فقررت تبلغه انه معندوش دم ؟؟ :V 

هتلاقي الرد في كل الحالات كلمه واحده
 "حبيبي تسلم" :3 

في الأغلب هتلاقي اتنين تلاته بس هما اللي بدأوا يقولوا الكلمه دي في الاول ومع الوقت بياخدوا علي عاتقهم المهمه الرسميه في نشر الفيرس :D  من كتر ما بسمعها بدات احس ان اللي بدع الكلمه دي بدأ يعمللها فرانشيز زي اللي ماكدونالز بتعمله وبيدفعلهم فلوس! :3 



وبعدين ليه زي ما في حبيبي تسلم مفيش حبيبتي تسلمي ؟؟؟ مش خايفين البنات ياخدوا بالهم ويقلبوها عليكوا نكد ؟ :vv 
لو في لحظة تهور سألت نفسك الكلمه دي انتشرت بالشكل ده ليه, فالبلوج  عملت بحث ميداني وجبنالك الأسباب

B| 
  
الاسباب الاربعه ل "حبيبي تسلم" (عشان ملقيناش السبب الخامس )  

1- لها القدره علي قصف جبهة أي حد بيغتت عليك من غير ما تضطر تقل ادبك  :D 

2- تستخدم لتجريد السفافين من اسلحتهم في السف واجبارهم علي ممارسة هواياتهم علي أشخاص آخرين


3- يمكن استعمالها في الكثير من الأحيان عشان تحول نقاش فورمال لقعدة قهوه :v 

4- ممكن ترد بيها علي أي حاجه في أي وقت, وتوفر المجهود الذهني اللي بتحطه في الردود لحاجات أهم زي إنك تلعب League of Lengends ايام الفاينل مثلا 



 بعد تدوير كتير مطلعتش الأسباب اللي فوق دي هي مصدر الفيرس :3
  روبرت زاجونك في جامعة ميتشجن, قاللك ان مش لازم الجمل اللي بتنتشر بين الناس دي  تنتشر عشان "منطقيا" ممكن نستعملها في مواقف كتير. حط المنطق اللي انت عايزه بس في الاخر هتنتشر بسبب الMere exposure effect النظريه دي بتقول إن ساعات كتير الناس بتفضل حاجه علي التانيه لمجرد انهم تعرضولها قبل كده كتير, لا عشان الحاجه دي أحسن ولا عشان فكروا منطقيا في الموضوع.

زي ما حصل مع "حبيبي تسلم", مره سمعتها من صاحبك ف سفيت عليها وسكتت, بعدها بكام ساعه قريتها في كومنت عالفيسبوك .....قاعد عالغدا وبتغتت علي اخوك لقيته بيقولها ....مره بعد مره عقلك بيبدا يتعامل مع الكلمه دي علي انها لامفر منها ....وبكده بتنتشر العدوي :D  




التجربه !! 

وعشان د/زاجونك يثبت ان ال mere exposure effect صح. قرر يعمل تجربه بسيطه جدا, جاب مجموعه من الناس ووراهم صور  عاديه خالص, حروف من اللغه الصينيه, كلمات اجنبيه عنهم, صور ناس ميعرفوهاش,.....إلخ 

كل مشارك في التجربه بيتعرض قدامه مجموعه من الصور مشافهاش قبل كده.  في كل مجموعه بيبقي موجود كام صوره كده بتتكرر قدامه كتير , في النهايه بيطلبوا من كل مشارك إنه يقيم كل صوره بإنه يديها score يعبر عن هي عاجباه قد ايه من غير ما يسالوه علي اسباب ولا اي 
  حاجه... التقييم مش موضوعي خالص, هما  بس بيسألوه الصوره دي لطيفه قد إيه How pleasant is this image  والرقم اللي بيحطه المشارك لكل صوره  بيعكس الصوره دي عاجباه قد إيه. النتايج كانت غريبه جدا! لقوا إن كل ما الصوره بتتكرر قدام الشخص اكتر كل ما بيديها تقييم أعلي. الصور اللي بتتعرض قدامهم مش صور لحاجات اتعاملوا معاها كتير قبل كده, فمعني ان في اغلب الحالات تلاقي نفس النتيجه, يبقي النظريه دي فيها جانب كبير من الصحه. 


الmere exposure effect هو السبب وراء  ان الشركات بتحاول تحط اللوجو بتاعها في كل مكان, هتلاقي اعلانات سفن اب الجديده متكرر اكتر من 40 مره عالمحور لوحده, مع ان منطقيا المفروض يحطوها عند كل مطلع كوبري عشان يضمنوا ان اي حد طلع الكوبري شاف الاعلان وعرف ان في منتج جديد وخلاص.....لكن بسبب ان عقلك بيحب الحاجات اللي بيشوفها كتير أكتر هتتلاقي ان الشركات دخلت سباق مين هيتشاف أكتر. 



العلاقه بين الفاينالز والmere exposure effect
الmere exposure effect علي قد ما هو مهم في الماركتنج فهو يقدر بسهوله شديده يلبسك في الحيط! وخصوصا في ايام الفاينل المفترجه اللي داخلين عليها دي ::D

الPDE ماد صعبه جدا,  الادب بتاع ثانويه عامه مملومبيتحفظش, كورس التفاضل نص الدفعه بتشيله.......الجمل الللطيفه دي لما تسمعها مرتين من صاحبك ده و 3 من صاحبك التاني ومره من المعيد علي كام مره تلاقيهم في بوستات مليئه باللطم عالفيسبوك عقلك هيبتدي يشوف ان الرأي ده رأي صح, واول ما تلاقي مساله مش عارف تحلها مش هتفكر انك مذاكرتش الشابتر كويس بس هتفكر ان اكيد عشان الماده صعبه .
عشان كده نحب نقولك من موقعنا هذا في البلوج  "مترميش ودنك لحد"  ممكن يكون هو شايف الPDE  صعبه عشان مقراش فيها كلمه من اول السنه, ممكن الادب مش عارف يحفظه عشان مفكرش مثلا انه شخص مبيحفظش بالتكرار لكن بيحفظ بالكتابه. ممكن يكون ليهم 100 سبب وسبب تخليهم حاسين ان الماده صعبه بس ده مش معناه انها في حد ذاتها صعبه! او ممكن الكبيره بقي .....!! 

ان الروش اللي عمال يقولك صعبه صعبه صعبه هو نفسه الشخص اللي هتلاقيه مقفلها اخر السنه, والترم اللي بعده قاعد بيحكي للدفعه الاصغر قد ايه الماده دي كانت سهله جدا جدا وانه كان برنس فيها


ده لينك مصدر الموضوع لو عايز تعرف أكتر
 http://socialpsychonline.com/2016/03/the-mere-exposure-effect/ 

فالخلاصه مترميش ودنك لحد, عشان عقلك ما بيصدق :v 
#في_رحلة_البحث_عن_ال_"حبيبي تسلم" 

#elBelog    




  

العجز المكتسب Learned Helplessness

0


 سنة 1967 دكتور مارتن سيلجمان من جامعة بنسلفانيا عمل تجربه مهمه جدا في تاريخ علم النفس. سيلجمان جاب مجموعتين من الكلاب, الاتنين اتحطوا في قفص ارضيته بتوصل صدمات كهربائيه للكلاب في اوقات مختلفه.....الفرق ان القفص بتاع أول مجموعه كان فيه زرار ممكن يدوسوا عليه بأنفهم فيوقف الصدمه الكهربائيه...في حين إن المجموعه التانيه الزرار بتاعهم مكنش ليه علاقه بالصدمه الكهربائيه فمهما داسوا عليه بيتكهربواا برده  ومفيش حاجه بتتغير, بمعني تاني المجموعه التانيه كانت عاجزه عن إنها تتفادي ألم الصدمه الكهربائيه  مهما عملت.

جم بعدها حطوهم في قفص مختلف....كل قفص متقسم لجزئين, جزء الارض فيه بتوصل صدمات كهربائيه وجزء أرضيته عاديه مفيهاش كهرباء.   بس المره دي الاختلاف ان قبل الكهرباء ب 10 ثواني في لمبه حمراء بتنور, و الكلب يقدر ف أي وقت ينط علي الحاجز اللي بيفصل بين الارض المتكهربه والارض العاديه فميتكهربش.

النتايج كانت فعلا مدهشه....لقوا ان مجموعة الكلاب اللي اتعودت تدوس الزرار فتفصل الكهرباء في التجربه الاولي اتعلموا ان اول ما يشوفوا النور الأحمر مكن ينطوا عالحاجز فميتكهربوش, في حين ان المجموعه التانيه كانت كل ما تشوف النور الأحمر يقعوا في الأرض ويعملوا اصوات توّجع ويستنوا الصدمه الكهربائيه لحد ما تيجي وتخلص, بمعني تاني لما كان عندهم الفرصه يهربوا من الصدمه الكهربائيه محاولوش حتي!! لأنهم اتعودوا ان الكهرباء ممنهاش مفر ......الاغرب ان بعد التجربه دي مجموعة الكلاب التانيه دي فقدت شهيتها للطعام وبدأ يظهر في تصرفاتها أعراض شبيهه جدا لأعراض الإكتئاب.
  

سيلجمان سمي الظاهره دي Learned Helplessness  أو العجز المكتسب, قاللك ان مع تعرض المجموعه الاولي من الكلاب للألم (الكهرباء) وعدم قدرتهم علي الفرار منه علمهم انهم مش هيقدروا يهربوا من ألم الصدمه الكهربائيه, حتي في الموقف اللي كان فعلا بإيديهم فيه انهم يلاقوا مفر.

بعد دراسات وابحاث كتير بعدها لقوا ان الLearned helplessness العجز المكتسب, مش بس في الحيوانات ده كمان بيظهرر بوضوح في البني أدمين, بس في حالة البني أدمين العجز المكتسب بيحصل علي حسب تفسير البني ادم للموقف, يعني لو حصللك موقف وحش وفسرته علي انه حاجه ملكش ذنب فيها ومع ذلك حسيت بالذنب برده (ده غريب بالنسبه لعقلك لان بالنسباله لو فعلا ملكش ذنب فيها مش هتحس بالذنب)  فعقلك بيرفض ينسي احساسك في الموقف ده وبيقتنع انه افعالك ملهاش علاقه بالنتايج اللي في حياتك, يعني من الاخر هيقولك انك  "ضحيه يا عيني ومفيش حاجه في إيدك :v "....أكبر مثال عليي الموضوع ده هما ساره وناديه

اللي جاي ده أمثلة من عندي لشرح مبدأ العجز المكتسب:

ساره وناديه ساره وناديه  صحاب من ثانوي جابوا 99% واتقبلوا في كلية الطب, الكورسات اللي بيدرسوها عجباهم جدا, والاتنين مجتهدين جدا.
في أول ميدترم في كلية الطب ساره جابت 85% وناديه جابت 70% ساره اتخضت جدا, ازاى بعد ما جابت 99% وكانت طول عمرها بتجيب الدرجات النهائيه تنزل للمستوي ده وتجيب 85% بعدها فضلت فتره زعلانه كده وقررت انها هتشد حيلها اكتر وبدل ما بتذاكر 5 ساعات في اليوم نخليهم 9 عشان ترجع تجيب الدرجات النهائيه زي الاول.

في الناحيه التانيه ناديه اتضايقت شويه انها جابت 70% بس فكرت انها في كليه واكيد نظام الكليه مش هو هو نظام ثانويه عامه....فقررت تعرف هي نقصت ليه ومسكت ورقة اجاباتها تشوف ايه اللي حصل.
ناديه لقت ان الاسئله متجاوبه صح بس في سؤالين المعيده صححتهم غلط, و3 اسئله في شابتر معين هي فعلا ضعيفه فيه, وسؤالين عرفت منهم انها فهمت الفكره العلميه غلط من الأساس, فرجعت ناديه ذاكرت اللي ناقصها كويس...فهمت الغلطه فين وعرفت هتعالجها إزاى وعدت الموضوع بسلام.

كل الكويزات اللي بعدها ساره دخلت الامتحان متوتره وخايفه لتجيب درجه زي المره اللي فاتت, في حين ان ناديه واثقه انها هتجيب درجات اكتر من المره اللي قبلها لانها عرفت غلطها فين وعالجته فهتتفاداه المره دي......متوسط درجات ساره بقي حوالي 72% وعمال بينحدر  بسبب التوتر اللي بتدخل بيه كل امتحان في حين ان ناديه كانت كل كويز بتشوف هي غلطت في ايه فتصلحه في المره اللي بعديها لحد ما وصلت ان متوسط الكوييزات علي ل 80%


قبل الفاينال ساره وناديه قاعدين بيذاكروا......ساره كل شويه تسرح, تسيب الكتاب وتقوم تعمل شاي....تيجي تقرا تلاقي انها مش فاهمه حاجه فتفتح الفيسبوك تشوف لو حد بعتلها رساله.....في النهايه ساره قبل امتحان الفاينال فعلا مذاكرتش كويس لان من جواها عقلها اتركب فيه "العجز المكتسب" وفهم ان مهما ذاكر مش هيعمل حاجه, فخلاها فعلا متذاكرش عشان تلاقي لنفسها عذر لما تجيب درجه وحشه.......بس اللي ساره مكنتش تعرفه في اول ميدترم ان الدرجات اللي نقصتها دي مكنتش بسبب أخطاء علميه, لكن بسبب ان المعيده جمعتلها الدرجات غلط, فبدل ما تجيب 95% ساره جابت 85%  لكن الصدمه والانفعال اللي ساره كانت فيه خلاها متفتحش الورقه وتراجع كويس هي غلطت في إيه عشان تصلحه  ....... في حين إن ناديه قبل الفاينال كانت قاعده مركزه جدا في المذاكره ومش خايفه انها تغلط لانها ببساطه هي شايفه ان طول الترم عماله تغلط وتتعلم من أخطائها, فعارفه ان في الغالب درجاتها هتكون كويسه. مش محتاجه اقول ان الاتنين دخلوا الامتحان وساره جابت 60% في حين ان ناديه كانت من الاوائل عالدفعه.


الفرق بين ساره وناديه هو تفسير الموقف, ناديه اخدت الموقف انها ذاكرت وعملت اللي عليها اذن فهي محتاجه تعرف ايه ممكن ينقصها درجات بالرغم من انها مذاكره, في حين إن ساره أخدت الموضوع علي نفسها أووي, وبدأت تحس انها بقت "فاشله"  ومع كل محاوله غير ناجحه ساره تقع فيها (لانها متعلمتش من اخطائها) بيتأكدلها أكتر انها مهما ذاكرت مفيش فايده لحد ما عقلها بقي يرفض يحط المجهود أساسا لانه عارف ان ملوش لازمه!!

العجز المكتسب Learned Helplessness 
العجز المكتسب ببساطه هو ان عقلك بعد محاولات فاشله كتير بيقرر انه مش هيعرف يتجنب الفشل, فبيجبرك بطرق مختلفه انك تبطل تحاول, ممكن ده يبقي انه يخليك تنام 12 ساعه كل يوم بدل 7 ساعات.....يخليك كل ما تمسك الكتاب تبقي نعسان.....يخليكي تقعدي ترغي في التليفون 4 ساعات وعندك تسليم مشروع بكره وانتي عارفه ان لو طولتي اكتر من ساعتين مش هتلحقي تخلصي والمشروع هيتسلم ناقص! المشكله ان مره بعد مره العجز المكتسب ممكن يتحول ل إكتئاب, ويبتدي الشخص يحس ان "مفيش فايده" وانه "ملوش لازمه" وان "مهما حاولت هأفشل" و ...و..و...

ممكن عقلك يتعرض للعجز المكتسب بموقف حصللك أثر عليك أوي, ففسرته بشكل سلبي وانتهي الموضوع علي إنه بعتلك رسالة "مهما حاولت تهرب من الألم مش هتعرف" ...... أو بيحصل بسبب التربيه الغلط.




ازاى التربيه ممكن تعلم العجز؟ 
تنويه: للأمانة العلمية باقي البوست والأمثلة اللي فيه مبنيه على فهمي لمبدأ العجز المكتسب وازاي ممكن يظهر في التربية والعلاقات, بس ده موردش في البحث اللي قريته لمارتن سيلجمان.

 التربيه الغلط هنا بتحصل لما الطفل بتتقطع بالنسباله العلاقه بين أفعاله والعقاب...... يلاقي انه

1- بيتعاقب/بيتهزأ علي حاجات في فطرته مش عارف يوقفها (لما يتعاقب عشان بيعيط, أو بيتعاقب عشان مبيعرفش يدخل الحمام لوحده)  يعني منطقي جدا ان طفل ما يعرفش ازاى يبطل عياط والام بتضربه , ماهو طفل برئ بيتضرب اكيد هيعيط, عايزاه يعمل ايه, يغني يعني؟ :v 

2- بيتعاقب من غير ما يفهم هو بيتعاقب ليه

 3-  الام او الاب يطلعوا همومهم وخنقتهم علي ولادهم, فكل ما الاب يرجع متنرفز من الشغل يقوم مزعق لابنه علي اي حاجه حتي لو مفيش سبب حقيقي للزعيق

طبعا بعد فتره من الغباء المطلق ده بيتزرع في الطفل انه مهما حاول يهرب من الألم مش هيعرف, الكارثه الكبيره إن الفكره دي بتتعمم في كل حته في حياته تقريبا...... وبيطلع أطفال مشوهين نفسيا في كل مكان في المجتمع, كوننا مجتمع مشوه نفسيا مجاش من فراغ يا جماعه والله :3 
من هنا بيبدأ أول سلمه في طريق لعب دور "الضحيه"  اللي لا حول لها ولا قوه.....أي نعم ممكن يبان ان مش منطقي ان الطفل يربط المواقف ببعضها بالشكل ده, بس في الواقع القرارات دي كلها بتبقي في مستوي العقل ال لاواعي, فالشخص كل اللي بيحسه انه مش عارف يغير الواقع وبس.......... في الغالب  مش هيخمن ابدا ان ده بسبب اليوم اللي مامته ضربته فيه عشان هي مخنوقه ولا بسبب الموقف اللي باباه عاقبه من غير ما يعرف هو عمل ايه غلط.  

من الحاجات اللي سمعتها برده قبل كده, ان مش بس  بيحس انه مش هينجح في حاجه, لا ده بيروح للحاجه اللي عارف ومتأكد انه صعب ينفذها ويقول انا هعملها, عشان يأكد لنفسه فكرة إن الواقع مؤلم وإنه ضحية الظروف........يعني  اي نعم انك تحلم حلم كبير حاجه جميله جدا ....بس لو مش معاك عالاقل خطوات تقدر تعملها دلوقتي تزقك ولو  سنتيمتر في اتجاه حلمك يبقي راجع حلمك تاني وشوف هتغير إيه

.
عجز العلاقات
اكتر مكان ممكن تشوف فيه نتايج الlearned helplessness  هو العلاقات....البنت اللي بتتجوز واحد هي عارفه انه شخص مش كويس وممكن يأذيها, الشخص اللي صاحبه بيستغله وبيجرحه وبالرغم من ده كله رافض يطلع من الصداقه المؤذيه دي, أو الكارثه الكبيره في مجتمعاتنا اللي بتحصل اما الزوجه تتهان ويبقي في ايدها تطلع من زواجها الفاشل فتقول "لا انا هقعد عشان اربي العيال" هو في الواقع جزء كبير من قرارها بيبقي نابع من العجز المكتسب, لان لو دورنا شويه في الغالب هنلاقي نماذج زيجات كتير انفصلوا في هدوء والاطفال اتربوا كويس وطلعوا زي الفل, أي نعم بيتأثروا  بس من ناحية تانيه حياتهم مع اب وام مجبرين علي بعض هتأذيهم أكتر بكتير......ممكن حاجات شايفنها صغيره جدا بنعملها مع الأطفال تدمر حياتهم لما يكبروا, فسواء أم أو أب أو معلم أو أي حد وظيفته بتقتضي التعامل مع أطفال, افهموا الاول نفسيتهم بتبقي عامله ازاى واتعلموا ازاى تتعاملوا معاها صح ازاى قبل ما تيجو ناحيتهم لأن لو بوظت فيه حاجه هتشيل ذنبه باقي حياتك.


لو اتعرضت لحاجه من دول او لقيت ان انت نفسك بتقع في شعور العجز كتير بدون سبب منطقي, ابدأ دور علي حل المشكله دي.....ربنا مخلقش حاجه ملهاش حل ايا كانت إيه الحاجه دي, فدور و دور واتأكد ان طول ما انت بتدور اكيد هتتفتحلك سكه. العلاج السلوكي المعرفيCognitive Behavioural Therapy بيتناول في جزء كبير منه حل مشكلة الLearned helplessness العجز المكتسب وعلاجها.....أنا حتي الآن معرفش علاج نهائي للموضوع ده بجانب العلاج النفسي, بس فيه كتابات كتيره عنه منها المقالات دي 

http://lifecoachplus.net/solutions-for-overcoming-learned-helplessness/

https://www.quora.com/How-does-a-person-overcome-learned-helplessness

لو لقيت/ي فيها حاجات مفيده ممكن تكتبهالنا هنا في كومنت أو علي بوست الفيسبوك :D


معظم الكونتنت في البوست متاخد من كتاب Understanding Psychology - Charles Morris , Albert Maisto

#آه_عقلك_ممكن_ينسي_عادي  :v



 
Powered by Blogger.

جميع الحقوق محفوظه © البلوج

تصميم الورشه