الفرق بينك وبين حسن شحاته

  

تنويه: البوست ده مكتوب بناءا على فهمي الشخصي للموضوع, مش مبني على دليل علمي بحت.

 إيه االفرق بينك وبين حسن شحاته ؟؟ 

يعني ليه  حسن شحاته بيمسك ورقه وقلم ويكتب اسم كام لعيب ويبعتها لاتحاد الكوره فيقرروا ان دي تشكيلة منتخب مصر لكرة القدم...  في نفس الوقت اللي إنت لو مسكت فيه نفس الورقه بنفس القلم وكتبت  اسامي شوية لعيبه وبعتتها 

لنفس اتحاد الكوره مش بعيد يبلغوا عنك :'D 

الفرق بينك وبينه هي الخبره 

يعني إيه "خبره"؟ 

الخبره: هي  قد إيه توقعاتك بتبقي زي اللي بيحصل في الواقع  عشان كده نقدر نقول ان اللي بيميز حسن شحاته هو إن التوقعات اللي حسن شحاته بيحطها بتطلع أصح من التوقعات اللي اي مدرب تاني بيحطها, يعني لما توقع ان اداء حضري مع التشكيله الفلانيه هيبقي كويس جدا ولقينا في الماتشات النتايج بتأكد كلامه وفعلا الفريق اخد كأس أفريقيا, ومره بعد مره كلام حسن شحاته بيطلع صح في أغلب المواقف...هنا بنقدر نقول ان حسن شحاته عنده خبره.

الفكره هنا إن الخبره بتطلع بشكل "احساس" يعني حسن شحاته وهو بيكتب اسماء لاعبين المنتخب بيكتب معظمها  عشان "حاسس"   ان التشكيله دي هتبقي ناجحه مع بعضها ولو سألته ليه كتبت الاسامي دي هياخد وقت عشان يجاوبك, وممكن جدا اجابته دي تكون غلط بس اللي تقريبا اكيد ان التشكيله الللي اختارها صح !  (الموضوع مش سبهلله كده, كمل الarticle للاخر هتفهم قصدي D: ) بالتالي عشان المنتخب يضمن ان التوقعات اللي هيختاروا ويدربوا اللاعيبه علي اساسها صح و نكسب كاس الامم الافريقيه الجايه بيختاروا حسن شحاته بدالك.

طب عقلك بيكتسب الخبرات أصلا ازاى ؟؟ 

 عقلك بيتعلم وبياخد خبره من خلال ال 

Pattern recognition

عقلك دايما  بيحاول يطلع سيناريو من الاحداث اللي بيشوفها حواليه و يبني عليها توقعاته. زي ان مثلا وانت طفل صغير كل ما تمسك حاجه وتسيبها تقع , تقوم ماسكها تاني وسايبها تقوم واقعه تاني :D  عقلك كل مره بيبني افتراضات ويختبر هلي هي هتمشي ولا لأ, بعد فتره لما يسيب الكوره هيبقي عارف انها هتقع وتعمل صوت, لو فجأه وانت عندك 16 سنه مثلا سيبت الكوره وموقعتش غالبا هيبقي قدامك احتمال من اتنين, يا اما حد عامل فيك مقلب يا اما في عفريت في البيت ( إلحق خد موبايلك من الأوضه وطير يا معلم :v ) !!  

ده لأن فجأه الخبره اللي عقلك مكونها طول عمره عن "ايه الي هيحصل لما تسيب الكوره" والسيناريو الطبيعي اللي عارفه اتكسر, يبقي في حاجه غلط ولازم ينبهك بإنه يحسسك بالخوف.

طب هو العمليه دي بنعملها بمزاجنا ؟؟

لأ يا فندم خاالص !! 

حسن شحاته وهو بيتفرج علي ماتش من غير ما ينوي يتعلم حتي بتحصل العمليه دي في عقله, مش هو وبس لأ ده اي حد بيشوف الماتش عقله هيقعد يحلله برده ويحاول يطلع منه pattern. 

 بس الفرق بينه وبين اي حد تاني بيشوف الماتش ان حسن شحاته عدي  بالمرحله دي من كونها مجرد ماتش بيشوفه ويقفل التلفزيون  لكونه بقي حاجه عقله بيعملها وبيتدرب عليها كل يوم مش اقل من 7 – 8 ساعات ومش بس كده ده كمان بقي بيخلي عقله الواعي ماشي في المنظومه دي يعني  بقي بيركز في كل حاجه بتحصل في الماتش ويقول احكام علي اللاعيبه  ويشوف هتطلع صح ولا غلط ومعاه مدرب اكبر منه بيوجهه ولو حط اي تخمين جديد بيجرب ويشوف نتايجه, نظريا لو اي حد عمل كده بنفس طريقة حسن شحاته هيبقي زي حسن شحاته :D 

ده إيه علاقته بشغلك ؟؟ 

 لو مبتحبش الحاجه اللي انت بتعملها بيبقى صعب عقلك يتعب نفسه ويعديك بكل المراحل دي, يعني هيبقى صعب يخليك تتابع الماتش بتركيز اوي كده وتقول هيحصل كذا هنا ولما ميحصلش تشوف هو محصلش ليه, ولا انك تروح كل يوم نادي 7-8 ساعات واكتر قاعد بتشوف الpatterns  اللي بتحصل قدامك وتقارنه بالتوقعات. 

ده من أحد الحاجات اللي بتفرق بين الناس اللي بتشتغل كتير وتطلع شغل "عادي" وبين الشخص اللي بيشتغل يطلع شغل عالمي!  في دراسات إتعملت لقوا فيها ان الناس العادية والناس المميزة أووي تقريبا بيبذلوا نفس عدد الساعات ونفس المجهود في الشغل بس الفرق في إكتساب الخبره هو انهم بيتعاملوا مع المعلومات والفشل اللي بيجيلهم في شغلهم ازاى. 

ده هيفيدك في إيه؟؟ 

 دانيل كويل عمل كتاب إسمه The Talent Code ِشرح فيه إزاى ان الموهبه مش هي سر التميز لكن اللي  بيفرق بين الناس هو ال Deliberate practice, اللي هو تطبيق مباشر علي طريقة العقل في التعلم, الموضوع كبير جدا مش هنعرف نشرحه هناللأسف (اقرا عنه علي جوجل, هيعجبك جدا ) بس الجزء الجاي هقولك تطبيق لل Deliberate practice ممكن تعمله علي أي حاجه عايز تتعلمها .

1- إقرا الفصل بتاع الكتاب فتخلي عقلك يدخلله المعلومات 

2- تقرا الفصل جزء جزء وتبدأ تحط تصورات بناء علي المعلومه اللي معاك دي, 

يعني لو قلنا مثلا ان قانون نيوتن بيقول لكل فعل رد فعل مساوي في المقدار ومضاد في الاتجاه فهتيجي تطبق دي مثلا في انك لو ضربت واحد صاحبك بالالم ايه اللي هيحصل ؟؟ ايدك هتوجعك ....هنا انت اخدت المعلومه وحولتها من ان عقلك بيتعامل معاها كمعرفه لكونه بيتعامل معاها ك خبره بيكتسبها, ممكن عقلك يوديك لان مثلا طب اشمعني لما باضرب المايه ايدي مبتوجعنيش ....... هنا عقلك ممكن يحط تخمين تشوفه منطقي او ممكن متعرفش فتسأل الدكتور او المعيد فتتعلم حاجه جديده او لو ملهاش اجابه ممكن تبدا انت نفسك تطلعلها اجابه. 

الموضوع ده ليه فايدتين  

اول فايده  ان عقلك بيحب جدا انه ياخد خبرات جديده لان ده بيرفع مستوي الدوبامين اللي بيتفرز في الجسم في حين انه بيكره تكرار نفس المعلومه بنفس الشكل كتير قدامه وبيحس بالملل منها 

  

تاني فايده حقيقة ان لو اتعلمت اي حاجه بالشكل ده لازم هتوصل لنقطة الإبداع, نقطة ان بقي قدامك نظريه ملهاش حل بس لانك عودت عقلك الواعي ه

 كمان انه يحط تصورات ويشوف هتبقي صح ولا غلط هتلاقي انه في مواقف بيحط فيها تصورات محدش حطها قبل كده, زي ما احمد زويل حط تصورات لمراقبة التفاعلات الكيميائيه من خلال نبضات الليزر محدش حطها قبل كده, وزي ما ستيف جوبز حط تصور للالكترونيات (ايباد وايفون) محدش حطه قبل 
كده وزي ما اي حد مبدع في الدنيا بيقدر يجيب افكار محدش قبله حطها قبل كده. ودول بنقول عليهم في مصر "برنس"  D: 

لما تعرف ازاى عقلك بيكتسب الخبره و تظبط طريقة شغلك وتعليمك معاها هتتعلم اسرع بكتير وهتعرف ايه اللي هيعلمك بجد وايه اللي مش هتطلع منه بحاجه "زي التعليم الجامعي في مصر كده  :3 " لأن كونك حفظت شوية معلومات مش هيديك خبره ولا هيخلي عقلك يقدر يحط اي توقعات. 

 لو عايز تقرا اكتر عن الموضوع ده فالمعلومات دي معظمها من كتاب
 How We Decide ل Jonah Lehrer

لو عجبك الموضوع هتلاقي  مقالات زيه كتير علي البلوج 3>
elbelog.blogspot.com.eg

#إعمل_زي_حسن_شحاته