فلوس بنك الحظ

في مرحله في تاريخ البشر (مش من بعيد خالص) إتحولت كل الفلوس اللي في العالم لأقرب ما يكون لفلوس بنك الحظ ! او الMonopoly ! وجه الشبه هو ان في لعبة مونوبولي (بنك الحظ) مكتوب في قواعد اللعبه ان "البنك ما بيفلسش أبدا" لما الفلوس بتخلص من البنك ويبقي في لاعب عايز يسحب فلوس من البنك ببساطه بنجيب ورقه ونكتب عليها مبالغ وياخدها اللاعب وكده ممكن يكمل اللعبه عادي!

مشكلة فلوس بنك الحظ دي بقت في كل العملات حتي لو دولارات ! لأ ده خصوصا لو كانت دولارات! تعالي نشوف الليله دي من اولها مالها بقي.

ايام ما الفلوس كان فيها بركه :v
بعد الحرب العالميه التانيه 44 دوله وقعوا علي اتفاقية Bretton Woods اللي اتحط فيها القوانين والأسس اللي بتحدد شكل التجاره بين دول العالم بعد الحرب, ولأن أمريكا كانت هي المنتصره ساعتها زائد ان كان عندها كميات كبيره جدا من الدهب فاتاخد قرار ان العمله الدوليه للتجاره بين ال44 دوله هي الدولار الامريكي.

يعني كل ما تشتري حاجه من صاحبك الفرنساوي بدل ما تبقي مضطر تبعتله دهب فدلوقتي ممكن تبعتله دولارات, ووالله هو وقت ما يحتاج الدهب بتاعه يطلب من امريكا تبدل الدولار بالدهب اللي عندها وأمريكا ملزمه بالاتفاقيه دي انها تديله دهب قد الدولارات اللي معاه. بالتالي بدل ما كل دول العالم كانت بتخزن كميات من الدهب عشان تستعملها في التجاره, بقت بتحوش دولارات أمريكيه وبقي إحتياطي النقد الدولي هو الدولار! كده امريكا بقت اكبر قوه اقتصاديه في العالم. من ساعتها ولحد سنة 1971 كان الدولار عباره عن وصل أمانه! يعني العمله الحقيقيه طول السنين دي كانت الدهب, الدولار الورق اللي انت ماسكه في إيدك ده هو عباره عن ورقه بتثبت انك تملك في البنك الكميه الفلانيه من الدهب في خزائن الدهب الامريكيهU.S. reserve fund . كل أونصه من الجهب (28 جرام تقريبا) بقي سعره 35$

في الفتره حوالين 1971 دول العالم لاحظت إن أمريكا بالرغم من التكاليف الرهيبه اللي بتدفعها في حرب فيتنام وبالرغم بردو من ان امريكا بتستورد وتشتري منتجات من دول تانيه اكتر بكتير ما بتبيع منتجاتها لباقي العالم الا انها ما شاء الله قادره تسدد كل ديونها بالدولار عادي جدا. O.o اللي حصل ان امريكا فعلا بدات تطبع فلوس ورق في السر لدرجة ان الفلوس الورق بقي اكتر من كمية الدهب اللي عندها. بعد ما الوضع بقي مريب جدا الدول دي ابتدت تطلب حقها ناشف ! وطلب الرئيس الفرنسي شارل ديجول من امريكا انها تستبدل 191 مليون دولار من الدولارات اللي في البنك المركزي الفرنسي ب دهب من خزاين الدهب بتاعتها U.S Gold Reserve

أمريكا بتفلس

وطبعا لان امريكا كانت فعلا في ازمه اقتصاديه فبدأت خزائن الدهب الامريكيه تتقشط!! :D و معني ان الدوله توصل لمرحلة ان معندهاش دهب في الخزائن ومعهاش عملات أجنبيه كافيه (لان الحاجات اللي بتبيعها اقل بكتير من اللي بتشتريه) فكده الدوله أفلست !

وضع أمريكا ساعتها كان حرج جدا !! من ناحيه عندك حرب فيتنام بتستنفذ من أمريكا مش بس فلوس لكن كمان تعويضات لاهالي المصابين والقتلي بجانب انها بتقلل عدد الناس اللي قاعده تشتغل وتنتج في البلد, في نسبه مش قليله من الشعب مشارك في الحرب ونسبه مش قليله برده عندهم اعاقات جسديه ونفسيه من احداث الحرب بتمنعهم انهم يشتغلوا!! عالجانب التاني من الصوره امريكا شغاله في الحرب البارده و في نص The Apollo Space Program اللي بدأت فيه أمريكا أخيرا وبعد سنين معافره انها تسبق روسيا وتتقدم عليها في مجال استكشاف الفضاء بإنجازات ملموسه!

إحنا بنتكلم علي أمريكا....... واحده من أكبر دول العالم علي وشك الإفلاس!!

النصبه الكبيره ! Nixon's Shock

سنة 1971 ريتشارد نيكسون أخد قرار نقدر نقول انه خلي أمريكا عمليا "تنصب" علي باقي دول العالم! نيكسون أصدر قرار بتجريم تحويل الدولار لدهب ! يعني صاحبك الفرنساوي اللي باعلك الشاليه بتاعه في فرنسا وأخد منك دولارات ميقدرش يروح لأمريكا يقوللها حوليلي الدولارات دي لدهب. القرار ده اتاخد واتوافق عليه من غير موافقة الكونجرس (مجلس الشعب), من غير ما يستشير وزارة الخارجيه state department والأهم من ده كله من غير الرجوع للنظام المالي العالمي International Monetary System اللي كان بيحكم المعاملات الماليه بين الدول وبعضها ! وكده امريكا كسرت واحد من اكبر البنود في اتفاقية Bretton والاتفاقيه اتوقفت!

!!والحفله بدأت من ساعتها

كده كل الدول اللي كانت محوشه دهبها (الاحتياطي بتاع الدوله) علي شكل دولارات امريكيه علي امل انها لما تحتاج الدهب تحوله من امريكا بقي معاها "عمليا" شوية ورق! حفلة عملات اتعومت في كل مكان في العالم, والعمله اللي المفروض انها ثابته وربطناها بالدهب وباقي العملات بتقيس قيمتها علي أساسها بقت هي نفسها مش ثابته, والنظام الاقتصادي العالمي بقي هش جدا.....ودي كانت اول طوبه في الازمه الاقتصاديه العالميه اللي حصلت سنة 2007 !

ولان الدول دي كلها مش هتقدر ترمي الدولارات اللي حوشتها دي في الزباله اضطروا انهم يمشوا مع امريكا في لعبتها ويقتنعوا ان امريكا عندها دهب يكفي الدولارات اللي بتطبعها, لان لو اعترفوا بعكس الكلام ده يبقي الدولارات اللي معاهم ميقدروش يعملوا بيها حاجه. ده كله عشان أمريكا تقدر تمول الحرب اللي شغاله وتشتري مواد خام للاسلحه والدبابات اللي داخله بيها الحرب براحتها.....في نفس الوقت تقدر تسدد اي ديون هي عايزاها لاي بلد تانيه لان العمله العالميه لسه برده الدولار. كده امريكا تقدر تطلع من اي دين اتزنقت فيه بانها تطبع ورق وتدفع بيه وده "علي حسب كلام روبرت كيوساكي" اللي مخلي أمريكا ما اعلنتش افلاسها لحد النهارده بالرغم من الكارثه الاقتصاديه اللي امريكا واقعه فيها دلوقتي

الدولار بقي عباره عن ورق زي بتاع بنك الحظ......ممكن تطبع زي ما انت عاييز وتصرف زي ما انت عايز حتي لو مبتشتغلش ومبيجيلكش فلوس! بس المشكله ان مع الوقت بيحصل تضخم inflation يعني لما الفلوس الورق في السوق بتبقي كتير من غير ما الفلوس دي تكون جايه من منتجات او خدمات اتباعت فمع فهتلاقي المنتجات كلها سعرها هيزيد. لو عايز تفهم فكرة التضخم Inflation أكتر شوف فيديو "مش الفلوس يا موكوس inflation " ل "الدحيح" بيشرحه بطريقه حلوه جدا :D

https://www.youtube.com/watch?v=1V7DVYpnSPs

ركز عالدهب !

المشكله ان من 1971 ولحد دلوقتي بلايين الدولارات الامريكيه اتطبعت, وبدل ما كان اونصة الذهب (28 جرام) ب 34 دولار تقريبا, بقي دلوقتي ب 1200 دولار. بس اللي حصل علي مدار السنين دي بيقول ان الحاجه اللي تقريبا مبتفقدش قدرتها الشرائيه هي الدهب! يعني سنة 1920 لو عايز تشتري عربيه فورد موديل السنه هتكلفك 400 دولار اللي هو 20 أونصه ounce او 567 جرام من الدهب. الغريب جدا بقي ان لو قررت تشتري عربيه فورد سنة 2014 هتكلفك 26 ألف دولار. اللي هو برضه نفس سعر ال567 جرام من الدهب !!

المصلحه اللي ممكن نطلع بيها من الكلام ده $$ :D هو إنك يا اما تلعب في نفس اللعبه وتعمل بزنس او تبيع منتج فلما الاسعار تعلي هتعلي اسعارك انت كمان وهتفضل تكسب, او لو عايز تحوش فلوسك حوشها دهب مش فلوس ولا حتي دولارات, لان ببساطه الفلوس الورق بتفقد قيمتها كل ما البنك المركزي يطبع فلوس جديده,وده لكل العملات مش الدولار وبس (البنك المركزي الامريكي بيطبع حوالي 1ز3 مليون دولار كل يوم تقريبا)........الموضوع ده تأثيره كان واضح جدا مع الناس اللي محوشه فلوس بالجنيه, لما قيمة الجنيه وقعت وكل حاجه غليت الناس دي لبست في الحيط لبسه وحشه أووووي لاننا بقينا بنطبع جنيهات من غير ما ننتج بتمنها لان ساعتها الاسعار بتغلي في حين ان المرتبات ما بتعلاش (زي اللي بيحصل دلوقتي كده).