نظرية العيال الفلته

 اشمعني اتنين بيتعلموا في نفس الجامعه بنفس الطريقه واحد منهم يطلع اينشتاين ويحط نظريه تغير الطريقه اللي بنشوف بيها العالم والتاني يتخرج يشتغل مدرس علوم في مدرسه المانيه؟ لو هتقول موهبه و"ربنا خلقه كده يا سيدي" احب اقولك ان مع الاسف مطلعتش الموهبه وبس ! :V

ونروح بعيد ليه ؟ معداش عليك في الجامعه واحد بيدح دح السنين وميجيبش درجات, في حين ان واحد تاني معاه في نفس الmajor بيذاكر 3-4 ساعات قبل الامتحان وبيقفل !
*لو مكنتش في هندسه او طب ومشوفتش العيال دي, فصدقني اه هما موجودين :D *

كال نيوبورت  كتب موضوع عن الظاهره دي بعنوان

If You’re Busy, You’re Doing Something Wrong: TheSurprisingly Relaxed Lives of Elite Achievers

 

قاللك ان مجموعة باحثين كان مضايقهم السؤال ده حبتين فراحوا اكاديمية فنون في المانيا وطلبوا من الدكاتره هناك يقسموا الطلبه اللي بيتعلموا كمنجه لمجموعتين, مجموعة العيال الفلته "Elite Players" ومجموعه تانيه مجتهده جدا بس مش متميزه زي المجموعه الاولانيه "Average Players" قعدوا المجموعتين سوا وطلبوا منهم يسجلوا كل حاجه بيعملوها من اول ما يصحوا لحد ما يناموا لمدة إسبوع.  بعد اسبوع اخدوا النتايج دي ومتوقعين طبعا ان الElite Players  دول اكيد بيتمرنوا عالكمنجه اكتر بكتير من الAverage players , بس بعد ما جمعوا الاوراق, النتيجه صدمتهم. 

يا عيني ده اتصدم ! 

مش بس المجموعتين بيتمرنوا نفس عدد الساعات بالظبط!!  لأ ده كمان العيال الفلته بيناموا عالاقل ساعه اكتر من التانيين, بيقضوا وقت اكبر بكتير في حاجات ترفيهيه (بيخرجوا مع صحابهم, يمارسوا هوايات مختلفه, يتعلموا حاجات جديده,.....).ومش بس كده ده لقوا ان الelite players  كانوا relaxed  اكتربكتير من المجموعه التانيه, واحسن ناس في  الelite players  كانوا relaxed عن باقي الelite players  يعني نقدر نقول ان كل ما كان الطالب relaxed  اكتر كل ما كان عازف أشطر. 

الباحثين استغربوا جدا! يعني منطقيا مينفعش ان اتنين بيتمرنوا نفس الوقت وفرق الاداء يبقي مختلف اووي بالشكل ده. بس لما فلتروا نتايج الدراسه دي لقوا فرق ملحوظ جدا!

العيال الفلته بتعمل ايه مختلف ؟ 

لقوا ان الElite players  بيشتغلوا بشكل مختلف جدا! من اول مواعيد تدريبهم عالكمنجه لحد الطريقه اللي بيتمرنوا بيها.

1- بيتدربوا عالكمنجه في مواعيد محدده في اليوم, ومبيتمرنوش غيرها. ولقوا ان احسن الطلبه في مجوعة الelite players  مبيشتغلوش الا في فترتين وبس خلال اليوم. لو دورت عليهم في اي وقت تاني هتلاقيهم بيعملوا اي حاجه غير التدريب.

2- تدريبهم وعزفهم بيبقي more deliberate  يعني بيقعد عدد الساعات اللي بيشتغلها مركز جدا علي انه يتعلم المهاره الجديده, بالتالي لما بيخلص فترة التدريب بيكون بالفعل اتعلم جزء كبير من المهاره دي وشاف قدامه تحسن ملموس. بالتالي شعوره بالرضا عن نفسه بيزيد وفي نفس الوقت الانجاز اللي عمله بيديله تحفيز انه يشتغل اكتر.
 

 هنا الكاتب اتكلم عن الفرق بين الHard work وال Hard-to-do work

قاللك ان  العيل الفلته اللي بيقفل امتحاناته بكام ساعه مذاكره ده, اي نعم مبيقضيش وقت كبير بس المجهود العقلي وحالة التركيز اللي بيدخل نفسه فيها بيبذل فيها مجهود اكتر من اللي بيبذله الطالب التاني اللي بيقعد طول النهار بيدح. اي نعم عشان تعود نفسك علي الطريقه دي الموضوع برده بيحتاج مجهود وشوية التزام.

الHard work  بالشكل ده مش سهل, بس هو الطريقه الوحيده اللي اي حد بيضيف بيها قيمه في ايحاجه سواء عزف او مذاكره او اي حاجه تانيه عموما 

نيجي بقي للناحيه التانيه, اللاعبين النص نصAverage Players ! دول اللي بيعملوا الـ hard to do work

بالرغم من انه بيشتغل نفس عدد الساعات الا ان توزيعته للتدريب علي مدار اليوم وطريقة التدريب بتاعته نفسها مبتعملش نتايج ملموسه فبيجيله احباط انه قاعد "طول اليوم" بيشتغل ومع ذلك النتيجه مش كافيه. فيزيد الstress  والضغط العصبي ويبدا يسيب الحاجات اللي كان بيحب يعملها عشان "مش فاضي" فيزيد الstress أكتر ويدخل في دوامه كبيره نهايته انه مهما يحط وقت اكتر في التدريب مفيش فايده.

وده ايه علاقته بيك؟ 

موضوع ال deliberate practice  فعلا مش اسهل حاجه ممكن تعود نفسك عليها بس لو هدفك انك تعيش مبسوط وفي نفس الوقت تأدي في مجالك علي مستوي عالي جدا "تبقي فلته من الاخر يعني D:  "  يبقي هتحتاج تعود نفسك علي الdeliberate practice وده "عن تجربه" هيفرق في جودة حياتك بشكل عام.

لو ليك/ي رأي تاني او وجهة نظر تانيه هكون سعيده جدا لو قولته/يه ونتناقش فيه, لان مفيش صح او غلط في الحاجات دي, ممكن كلامك او تفكيرك يفتح سكه لاوبشن تالت محدش فكر فيه قبل كده! D: 

لو عجبك الArticle فمعظم الcontent متاخد من موضوع Cal Newport 

If You’re Busy, You’re Doing Something Wrong: The Surprisingly Relaxed Lives of Elite Achievers

لو دعبست في البلوج بتاعة الكاتب ده هتلاقي حاجات حلوه جدا ;)