زرار الحرب النوويه

لو درست فلسفه قبل كده فانت اكيد عارف القصه اللي هحكيها دلوقتي, بس كمل قرايه بردو هتنبسط :v 

Trolley Dilemma

الفلاسفه  طرحوا سؤال خيالي  عشان يقدروا يفهموا هل إحنا فعلا بنفكر بمنطقيه بحته ولا في
قرارات بناخدها بيترمي فيها المنطق علي جنب ؟؟

Trolley Dilemma

بتقوللك  تخيل ان أنت قررت تنزل تتمشي, وانت معدي جنب  قطر سكه حديد شفت خمس عمال صيانه بيصلحوا سكة القطر...... بتبص وراك  لقيت القطر جاي بسرعه جدا من بعيد والعمال هيتداسوا,  قعدت تندهلهم وهما مش سامعينك. وانت بتنده شفت انك جنب محطة التحكم وانت عارف ان فيها زرار (انت عارف مكانه) لو دوست عليه ممكن تغير سكة القطر لطريق تاني وتنقذ الخمس عمال  بس المشكله ان السكه التانيه فيها شخص واحد واقف..........هتختار انك تسيب القطر ماشي زي ما هوا ويقتل الخمس عمال ولا هتدوس عالزرار  وتحود سكة القطر 
فتموت الشخص اللي واقف علي الطريق التاني؟؟؟

 وقف قرايه دقيقتين وفكر كده هتعمل إيه

معظم الناس بيختاروا انهم هيدوسوا عالزرار لأن لما واحد يموت أحسن بكتير من لما خمسه يموتوا,  قاللك ماشي بس افرض انك مكنتش ماشي جنب القطر, انت كنت ماشي علي كوبري بيعدي فوق طريق القطر,  والمره دي مفيش طريقين هوا طريق واحد بس وشايف القطر جاي من بعيد و أكيد هيقتلهم  وانت في حالة الفزع دي شفت واحد تخين جدا معدي عالكوبري, الراجل ده لو زقيته هيقع علي طريق القطر ويسده  وهيبطأ حركة القطر  جدا لدرجة إنه هيدي وقت كافي  للخمس عمال انهم يجروا وينقذ حياتهم,  هل هتختار المره دي انك تزقه وتنقذ
حياة خمس اشخاص ؟؟ 

 الغريب جدا إن معظم الناس في الحاله دي قالوا لأ طبعا  مش هنزقه !! طب ليه ؟؟؟ ما هو في الموقف اللي فات وافقت ان واحد يموت عشان خمسه يعيشوا طب ما هنا برده واحد هيموت وخمسه هيعيشوا ايه الفرق ؟؟؟ 

اختلف تفسيرات الفلاسفه كتير في الموضوع ده بس علم النفس التطوري Evolutionary psychology  قدر يطلع بتفسير منطقي 

   قاللك ان الفرق بين موقف الزرار وموقف إنك تزق شخص خلي الموضوع اتحول من مجرد دوسة زرار لكونك بقيت بتتفاعل مع إنسان تاني (بتزق بني أدم بإيدك). لما عملوا  Brain scan لمجموعه من الأشخاص وهما بيتعرض عليهم الموقفين اللي فاتوا. لقوا إن الناس وهي بتسمع كل موقف من الاتنين مناطق المخ النشطه بتختلف جدا!

لما  كان المطلوب منهم بس يدوسوا عالزرار عشان ينقذوا الخمسه ويموتوا واحد  كانت المناطق المسئوله عن التفكير المنطقي نشيطه جدا بس المناطق المسئوله عن القرارات العاطفيه مكنتش شغاله! لكن لما بقي مطلوب إنهم يزقوا الراجل من عالكوبري عشان ينقذوا الخمسه, المناطق المسئوله عن القرارات العاطفيه في المخ هي اللي كانت نشيطه جدا والجزء المنطقي نشاطه قل جدا

بمعني تاني إن لما بقي مطلوب منك تتفاعل مع إنسان تاني بشكل مباشر بتنقل المشكله من
انها بالنسبه لعقلك  عمليه حسابيه مجرده لكونها إتحولت لقرار عاطفي في المقام الأول.

 اللي علم النفس التطوري (Evolutionary psychology( قاله إن في بدايات حياة البشر علي الكوكب كان اطول مسافه يقدر يتفاعل فيها الإنسان مع بشر تانيين هي طول دراعه أو بالكتير أووي طول عصايه, يعني لو المسافه بين شخصين ابعد من طول الدراع يبقي معندهمش أي طريقه يتفاعلوا فيها مع بعض, لأن اللغه لسه ما كانتش اتبلورت بشكل سليم.

 وقعد الوضع كده لألاف السنين وبقت هي دي الطريقه اللي عقلك متبرمج عليها, من الناحيه التطوريه تقدر تقول ان أسلاك عقلك مبتفهمش ان بيحصل تفاعل مع بني أدم تاني غير لما تلمس الشخص اللي بتتفاعل معاه, يعني عقلك بالنسباله القتل هو إنك تطعن,  الحب انك تحضن أو تلمس الشخص الللي بتحبه, وده بيعمل أقوي ردود فعل في نفسية البشر بسبب إن الطرق التانيه (زي الصواريخ  أو إنك تبعت SMS لشخص تقوله فيها إنك بتحبه) لسه مستحدثه علي العقل من قريب فمش بتدي نفس التأثير في نفسية البشر.

 وأكبر دليل علي كده إن الجنود اللي بينزلوا ساحات المعركه بيرجعوا مدمرين نفسيا وتقريبا كلهم بيحتاجوا فترات من العلاج النفسي عشان يرجعوا زي الأول, مع ان الجنود في قواعد الصواريخ وأجهزة الاستخبارات مبيحصللهمش ده كله بالرغم من ان شغلهم بيتسبب في قتل ناس برده وهما عارفين كده.

عقلك لسه مصدوم يابني D: 

في خلال الكام قرن اللي فاتوا بس بقي ممكن ان الانسان يتفاعل مع غيره من مسافات بعيده, من اول الرسايل المكتوبه لحد ثورة الاتصالات في ال 100 سنه اللي فاتوا اللي خلتك تقدر توصل وتتفاعل مع معظم سكان العالم في اي وقت انت عايزه, لدرجة إنك بعد إختراع القنبله نوويه ممكن  بضغطه زرار  تبيد شعوب بأكملها.

 في الوقت ده كله العقل العاطفي للبشر لسه ما لحقش يستوعب إن فعلا حاجه غير عاطفيه تماما زي ضغطة زرار ممكن تهدد بقاء الجنس البشري . عشان كده سنة 1960 مفكر سياسي قال ان احسن حل ممكن يمنع قيام حرب نوويه هي ان الزرار المسئول عن اطلاق القنابل النوويه يتزرع في قلب أعز أصدقاء رؤساء الدول الكبري في العالم, لان ده هينقل القرار من كونه ضغطة زرار هيبدأ بيها حرب ل انه لازم يفتح قلب اعز اصحابه عشان يبدأ الحرب.

طب طلعنا من ده كله بإيه يعني ؟؟ 

بنطلع من ده كله بإنك ما تثقش ان كل قراراتك صح يعني D:  لأن بيولوجيا غصب عني وعنك العقل العاطفي بيتحكم في تفكيرنا, وإن حتي في أكتر المواقف اللي المنطق فيها بيقول الحسبه واحده (في الحالتين بتختار بين موت خمس أشخاص أو موت شخص واحد) إلا إن تغيير بسيط جدا في طريقة التنفيذ خلت قرار معظم الناس يختلف في الحالتين.

مش هقولك إحسب كل حاجه بالمنطق 100% بس قبل ما تاخد قرار أقعد مع نفسك وإعتبر إنك ملكش علاقه بالموقف اللي انت فيه وإنه بيتحكيلك من حد تاني, وشوف قرارك هيكون إيه وحاول توازن بين القرار اللي اخدته بالتفكير المنطقي وبين الحاجه الواقعيه اللي ممكن تعملها, ده ممكن يخليك تشوف الموضوع بصوره أوضح فتاخد قرارات أحسن.


المعلومات دي من كتاب Incognito : The secret lives of the brain لـــــDavid Eagleman لو عجبك الموضوع إقرأ الكتاب هتلاقي تفاصيل أكتر D:



#عقلك_مش_دايما_منطقي