الناس بتسمع لمين؟

ايا كان فكرتك عظيمه او مبدعه او مفيده  ازاى فاصعب واخطر مرحله هتعدي بيها هي انك تخلي الناس تتقبل الفكره بطريقه او باخري, لان معظم الافكار اللي هتجيلك هتحتاج مساعدة ناس فيها ده لو ما احتاجتش موافقتهم المباشره (زي مثلا لو كانت فكرتك  إنك هتغير الطريقه اللي مصروف البيت بيتصرف بيها لا سمح الله  :v ).

  وممكن الموضوع يوصل لدرجة إن ايمانك بفكره جديده عايز تعملها يبوظ ثقة الناس فيك للابد او يعمللك مشاكل مع ناس علاقتك بيهم مهمه "اهلك, زمايلك, رؤسائك"  ويبدأوا يشوفوك ك شخص غير منطقي مينفعش نثق في رأيه......من اهم الحاجات اللي الناس المبدعه بتكون عارفاها هي مش بس انه يجيب فكره جديده, لكن الأهم إنه  ازاى يخلي ناس كتير  تتقبل فكرته "حتي لو مبدأيا" باقل خسائر ممكنه سواء في علاقاتهم او في ثقتهم فيهم.


مصروف البيت (:3

جاتلك فكره جديده جدا هتقلل مصاريف البيت عندكوا النص, الفكره مفيهاش مخاطره تقريبا, فكرة جديدة وتنفيذها مش صعب. بس عشان تتنفذ انت تقريبا هتغير السيستم اللي البيت ماشي بيه في حاجات كتير جدا :D

الواقع بيقوللك ان في الغالبيه العظمي لما هتيجي تعرض الفكره دي علي باباك ومامتك هتترفض !! مش لسبب غير لانك عايز تغير نظام اصلا قائم, وطبيعة العقل البشري بتفرض عليه انه بيحس بالخطر من أي تغيير (أحيانا حتى لو تغيير للأحسن). بس الواقع الصادم برده بيقولك إن ممكن لما اخوك الكبير  يعرض نفس الفكره اهلك ينبسطوا بيها جدا جدا وتتنفذ ويبقي هو العبقري اللي إنقذ البيت من أزمه ماليه محتمله :v ده مثال في البيت بس لو بصيت في حياتك عموما هتلاقي ان تنفيذ الافكار الجديده بيتوقف علي مين اللي قال الفكره اكتر بكتير من الفكره نفسها, يعني لو مثلا شخص معين في الاجتماع قال فكره الناس هتقتنع بيها في حين ان لو حد تاني قالها هيتهاجم بشده!! واحيانا بيحصل الموقفين في نفس الميتنج وعلي نفس الفكره D': واحد بيقول نفس الفكره اللي انت لسه قايلها  بس بشكل مختلف وتلاقي الناس مرحبه بيها مع انك كنت بتتشتم بسبب نفس الفكره من خمس دقايق.

وقبل ما تردد اللي كنت بتقوله ساعتها في الميتنج  ف لأ صدقني الناس دي مش مجانين :v

في ناس ممكن تقول ان التاني بيعرض الفكره بطريقه ذكيه عشان كده اقنع الناس..... العنصر الاساسي اللي  الناس عشانه قبلت الفكره مش الطريقه اللي اتقالت بيها خاالص, سلسلة البوستات خلال اليومين الجايين دول مهمتها انها تعرفك ازاى  توصل فكرتك للناس من غير ما تخاطر بسمعة قواك العقليه :'D


في أوقات الخبره هي اللي بتحكم مين كلامه بيتسمع, يعني لما د/أحمد زويل مثلا يقترح فكرة  مشروع جديد في مجال الكيمياء أكيد يعني هيتسمع أكتر مما لو كنت إنت قلتها مثلا D': بس مش ده موضوعنا النهارده.عندك مكانه ولا منصب؟ 

اول واهم نقطه في إنك تخلي الناس تسمعلك هي انك تعرف الفرق بين المكانه والمنصب!!

 المنصب هو ان يبقي ليك سلطات فوق مجموعه من الناس, من حقك تديلهم مهمات يعملوها او مطلوب  منهم تنفيذ اللي بتقوله أو أي سلطه بأي شكل. أما المكانه فهي ان الناس تحبك وتحترمك. فلو عايز الناس تديلك المساحه انك تعمل فكره جديده او تغير الطريقه اللي بيعملوا بيها اي حاجه "زي مثلا ان مامتك تبطل تنزل هايبر وان كل يومين عشان توفر في ميزانية البيت D:  " يبقي لازم يكون عندك مكانه واحترام عندهم وده أهم بكتير من المنصب. لأن الناس ببساطه مش بتسمع الا للشخص اللي بيحبوه وبيحترموه, مش للي مجبرين يسمعوا كلامه!


طب الناس في المواقف دي عقلها بيقرر إزاى ؟

الناس من غير ما تحس بتعاقب اي حد بيحاول يفرض فكرته قبل ما يكون كسب حبهم احترامهم, العقل البشري بيفكر بطريقة "بما انك ما كسبتش احترامي وتقديري ليك فملكش الحق انك تقولي اعمل ايه ومعملش ايه" الكلام ده مش بس للناس اللي عايز تقنعهم بفكرتك في نفس مستوي السلطه بتاعك "زي صحابك مثلا اواخواتك" لكن حتي لو انت ليك سلطه عليهم بس ملكش مكانه يبقي معظم القرارات اللي هتاخدها هتتهاجم بعنف جدا حتي لو كانت صح, وممكن اوي توصل لمرحلة ان فعليا في ناس رافضه تعمل الغل بالرغم من كون ليك سلطه عليهم. وده سبب معظم الصراعات في الشغل والteam work عموما .

 هل الناس فعلا حاسين من خلال افعالك وتعاملك معاهم انك بتقدرهم وبتحترمهم ولا لا , يعني هل بتحترم رأيهم فعلا ولا بتسمع من ودن وتخرج من التانيه ؟؟


عشان نجيب إجابه علميه للسؤال ده, باحثين في جامعة نورث كاروليا عملوا تجربه عشان يعرفوا هل كونك عارف رأي حد فيك هيأثر علي تعاملك معاه ولا لأ, فعملوا تجربه و جابوا مجموعه من الناس وقسموهم مجموعتين,  كل مجموعه من المجموعتين متقسمه كل اتنين من المتطوعين مع بعض

المجموعه الأولي: اتطلب من واحد من الاتنين انه يدي مهمه لشريكه, لو المهمه اتعملت صح شريكه هياخد 60دولار, بس قبل التجربه اتقال للمتطوع اللي بيدي المهمه ان شريكه بيحترمه جدا وبيقدره

المجموعه التانيه: اتطلب منها نفس الحاجه بس بدل ما يقولوا للشخص اللي بيدي المهمه ان شريكه بيقدره قالوله ان شريكه شايف انه شخص غبي وبيحتقره جدا.

وكانت النتيجه ان المجموعه الاولي "اللي اتقالهم فيها ان شريكهم بيحترمهم وبيقدرهم"  المهام اللي اتقالت فيها كانت حاجات سهله جدا زي مثلا  ""اكتب 10 حاجات بتحبها في حياتك"  او "ارسم قطه"

"في حين ان المجموعه التانيه المهام اللي اتطلبت فيها كان كلها تقريبا حاجات مهينه او صعبه زي مثلا "اعمل نفسك كلب لمدة خمس دقايق"  او " عد من 100 ل 1 بالعكس بمضاعفات الرقم سبعه  D': "

الدراسه دي اكدت ان فعلا لما العقل البشري بيحس ان شخص معين مش بيحترمه او شايف عنه صوره سلبيه بدل مابيعمل "المنطقي" انه يحاول يحسن صورته قدامه  لقوا انه بيتصرف بالعكس وبيبدأ انه يحاول يضايق الشخص ده باي شكل من الاشكال او يسببله اذي نفسي كشكل من اشكال الانتقام , أحد اهم الاشكال دي انه يحسسه بانه مش فاهم حاجه ويهاجم اي فكره بيقولها بسبب وبدون سبب. ....عشان كده لو الفكره حلوه فعلا وحد غيرك قاللها هتلاقي نفس الشخص اللي كان بيهاجمك مقتنع بالفكره وبيساندها جدا !

بس خلي بالك ان الكلام ده بيحصل علي المستوي اللاواعي, يعني هو مش داخل الميتنج مجهز نفسه انه يشتم في كل فكره بتقولها :'D, لكن ببساطه نتيجه لتجارب سابقه ليك معاه عقله  بيصورله كل افكارك علي انها تافهه. دليل علي ده إنه إحيانا لما تسأله طب بتقول الراي ده ليه  هتلاقيه هو نفسه متلخبط ومش عارف هاجمك ليه أصلا (إلا لو فكرتك مش قويه ونقده صح فعلا, في الحاله دي إسمع اللي بيقوله من غير أي انفعال وصلح مشاكل فكرتك) .

الباحثين قالوا في النقطه دي ان 

"Just by being told that they weren't respected doubled the chances that they use their power in ways that degraded others"

الكلام اللي فات ده كله تقريبا قاله ادم جرانت في كتابه Originals, بس في نقطه زياده "مش عارفه هتتقال في جزء تاني من الكتاب ولا لا لاني لسه مخلصتوش :'D " , ان حتي لو ليك مكانه عندهم ممكن فكرتك تقف بسبب انهم مش شايفينك credible او اهل للثقه, يعني لو معروف انك بتخلص مصروفك نص الشهر فغالبا اهلك مش هيسمعولك في موضوع انك تغير الطريقه اللي البيت بيصرف بيها لان ببساطه انت لو فاهم اووي كده ما كنت ساعدت نفسك الاول ونظمت فلوسك. 

ده برده من اقوي العوامل اللي هتساعدك انك تقنع الناس بتنفيذ فكرتك الجديده, يعني لو ديف رامسي "اشهر خبراء الPersonal finance في العالم" قاللهم كده هينفذوا كلامه بالحرف من غير نقاش, لان ببساطه الراجل ده عمل نتايج في حياته تثبت انه فاهم ومجرب اللي بيقوله.


طيب تعمل إيه لو عايز الناس تسمع لأفكارك ؟ 

1- إكسب احترامهم وحبهم

2- قدرهم فعلا واسمع رائهم وحطها جديا في اعتبارك دايما لو عايزهم يسمعولك, النقطه دي اللي بيثبتها الافعال مش الكلام , يعني لو كلامك بيقول انك بتاخد برايهم وبتحترمهم بس اافعالك بتقول العكس فغير انه هيحسوا انك بتضحك عليهم ودي كفيله انهم مش بس يهاجموا افكارك لا ده انت شخصيا هتتهاجم معاها كمان D:

3-إبني عندهم ثقه في قدراتك دي بتحصل بانك تعمل انجاز كبير تعرفهم من خلاله انك فاهم اللي انت بتقوله وعندك خبره فيه حتيلوالخبره دي صغيره بس مؤثره, تثبتلهم ده من خلال نتايج ملموسه عملتها علي ارض الواقع مش كلام وبس.  يعني لو هنطبق ده علي المثال بتاعنا فلو عايزفكرتك في البيت تتنفذ يبقي هتحتاج مثلا  انك تحوش تمن لابتوب في 7 شهور من مصروفك او علي الاقل يلاقوا انك بتعرف توفر مبالغ كويسه من مصروفك كل شهر.

محتوي البوست ده فكرته من كتاب آدم جرانت Originals: How non-conformists move the world  :D الكتاب ده عظيم جدا يا جماعه أقروه :v

لينك الكتاب من أمازون



البوست الجاي هيحكي ازاى جريسكوم اقنع شركة ديزني انها تشتري شركته بانه قاللهم "اهم خمس اسباب تخليكوا متشتروش الشركه دي" :D وقدر فعلا يبيعها ب 40 مليون دولار :v