اوريچنال...؟؟

 اول ما بتسمع كلمة اوريجنال ايه بييجي في دماغك ؟؟  

طيب المفروض قبل ما نتكلم علي كلمة Original عموما  نعرف يعني ايه original اصلا :D 

الفكره ال Original  هي فكره جديده ما اتعملتش قبل كده. لما تيجي  تدور  في تطور الحضاره البشريه علي مدار التاريخ هتلاقي ان الافكار ال Original هي اللي بتزق البشريه لقدام (نسبية اينشتاين), هي اللي بتعمل تغيير في حياة الناس (غاندي ونظرية اللاحرب)  وكمان هي اللي بتكسب اصحابها كويس اووي $$  ;) (ستيف جوبز والايباد  مثلا:V (  وبالرغم من ان كلمة  Originalنفسها مرتبطه بحاجات مختلفه خالص في دماغ كل واحد فينا.  هتلاقي ان ايا كان هي مرتبطه عندك بايه فهي مرتبطه بحاجه قيمتها عاليه اووي, وغالبا حاجه مفيش منها اتنين, مش شرط ان الفكره نفسها مفيش منها اتنين  ممكن تكون ال Originality والابداع في عرض الفكره  نفسها  (زي الاعلان ده مثلا -https://goo.gl/L5Bsnk:D ( - او ابداع في اتقان الصناعه (محركات العربيه الالماني D': ) 

قصة واربي باركر 

 سنة 2009  ديفيد جيلبو كان واقف في طابور بيشتري iPhone, وطبعا لان ساعتها ابل كانت في عزها فالطابور كانت طويل حبتين, , فمن كتر الزهق ديفيد بدا يفكر في حاجات عميقه D:  زي مثلا  هو النضارات غاليه اووي كده ليه؟؟ :v  بجد يعني ليه نضاره مصنوعه من ازاز وبلاستيك تبقي اغلي من iPhone ؟   مع ان  المفروض انها تكون منتج منتشر والناس بتستعمله كتير  ده غير إن ال iPhone جهاز معقد بيعمل وظائف كتير جدا  واكيد المواد الخام بتاعته اغلي بكتير من البلاستيك والازاز  ( في الوقت ده كان تمن النظاره الطبيه الواحده حوالي 500 دولار  في امريكا يعني ما يعادل دلوقتي 5000 جنيه مصري D: ).


بدأ ديفيد  يدور في اسباب ارتفاع السعر بالشكل ده, ساعتها كان معظم  الناس بتقول اكيد في جزء مكلف جدا في النضاره بيخليها غاليه, بس لما دور كويس لقي ان السبب ملوش علاقه بالتكلفه, الحكايه كلها إن شركة Luxoticca مهيمنه علي سوق النضارات كله وبتمتلك كل الشركات اللي بتبيع نضارات, بالتالي بيحددوا السعر اللي هما عايزينه والناس مجبره تشتري عشان مفيش غيرهم في السوق !  والمفاجاه انه لقي ان صناعة النضاره الواحد اقل من 100 دولار. يعني بيكسبوا في كل نضاره حوالي 4000 جنيه  :v

فقرروا يبداوا شركة تبيع النضارات من عالنت بحيث ان النضاره الواحده تكون بسعر معقول 95$ تقدر الناس تدفعه, وعملوا اوبشن انك ممكن تطلب مندوبهم يجيبلك النضاره تجربها في بيتك عشان الناس محتاجه تقيس النضارات قبل ما تشتري. 


مجرد سؤال واحد سأله وهو واقف في طابور بيشتري ايفون قدر من وراه يكون واحد من مؤسسين شركه بتجيب مليارات كل سنه, الفكره اللي جت في دماغه دي هي اكبر مثال لللافكار ال Original اللي بتتحدي الحاجه اللي كل الناس متفقه عليها,  بالرغم من كون ناس كتير بتعاني منارتفاع صعر النضارات إلا انه هو الوحيد اللي قرر  يدور ويعرف السبب ويغير الموقف اللي مضايقه. 

 شركة Warby Parker اللي اسسوها دي دلوقتي  تعتبر من أكبر شركات النضارات الطبيه في العالم, و قيمة الشركه ماليا بحوالي ب (1.2) مليار دولار 


الإبداع بييجي منين ؟؟ 

في كتاب Originals : How non-conformists move the world شرح ادم جرانت الافكار الOriginal والابداع بييجوا منين. وهل فعلا بيقتصر علي الناس اللي اتولدت مبدعه وبس؟؟ ولا الافكار الثوريه مقتصره علي الناس اللي بتحب المخاطره؟  طب لو بتقتصر عليهم نبقي زيهم ازاى ؟ 


ادم  قال إن اللي بيخلي مش كل الناس بتنفذ افكار مبدعه مش انهم مبيجيلهمش افكار, لكن اللي بيوقفهم حقيقة ان الافكار اللي بتكسر التقليدي بتجبر صاحبها انه يخاطر و يطلع من منطقة الراحه بتاعته, انه يغامر ويكتشف طريقه مختلفه يعمل بيها الحاجه اللي كل الناس بتعملها. والاهم من ده وده انه بيحطهم في الخطر بتاع "الناس هتتريأ عليا" " لو فشلت  هيقولوا عليا فاشل"  "ممكن الفكره متنجحش"  ده لا يعني ان الناس المبدعه ما بتخافش, بالعكس الناس دي بتخاف زي اي حد تاني ويمكن أكتر كمان بس الفرق انهم بيعودوا نفسهم يؤمنوا بافكارهم  ويمشوا وراها حتي لو خايفين.



بالتالي نقطة البدايه لعملية الابداع بتكون الفضول, انك تسأل نفسك هو ليه الحل ده اصلا موجود؟؟ انك تفكر تشوف حاجه شوفتها كتير قبل كده بس بطريقه جديده, لو جربت الperspective ده في اي حاجه هتلاقي بيحل مشاكل كتير :D 

 إزاي تبقي Original ؟؟ 

ممكن نقسم الكلام ده لخطوات ممكن تساعدك لو عايز تجرب اللي عمله ديفيد 3:) وربنا يستر بقي v: 


1-أقف علي أكتر مشكله مضايقاك من المشاكل اللي حواليك 
2- إسأل نفسك الحل الحالي للمشكله موجود ليه وهو مبيحلش المشكله أصلا؟ 
3- إرمي الحل ده في الزباله :D 
4- إبدأ إسأل نفسك لو في حل بديل (دايما لو فكرت بشكل كافي هتلاقي حل بديل) أو هي ممكن تجيب الحل القديم الفاشل من الزباله وتعدل فيه حاجات فيبقي فعال D':

5-جمع شجاعه كافيه تخليك تتحرك وتنفذ فكرتك بالرغم من انك خايف تفشل, أصل إنت عايش مره واحده يعني إيه أسوأ حاجه ممكن تحصلك ؟؟

6-حط خطه تنفذ بيها  الحل ده

7- حط Back-up plan تقلل الخساير لو أسوأ سيناريو حصل.

7-نفذ خطوه وخطوه وغير الواقع :V D:

ممكن تنزل  بالفكره دي علي مستوي حياتك انت, جرب تدور ايه الحاجه  اللي مضايقاك ومتقبلها لانك شايف ان مفيش حل تاني؟ اسأل, غير الحل اللي مضايقك و دور وهات  بنفسك حل  احسن منه......لو كل يوم طبقت الموضوع ده في مشكله قدامك اكيد هتلاقي  حلول مفكرتش فيها قبل كده حياتك هتبقي اسهل بكتير.


لو عايز تقرأ أكتر عن الموضوع أقرأ كتاب آدم جرانت Originals, How non-conformists move the world